Shahtınsk qalasynda ónerkásip kólemi ósti
QARAǴANDY. QazAqparat - Shahtınsk qalasynyń ákimi Serjan Aımaqov halyq aldynda esep berdi. Jergilikti turǵyndar TKSh, abattandyrý, shaǵyn jáne orta bıznesti damytý máselelerine qatysty saýaldaryn qoıdy, dep habarlaıdy QazAqparat tilshisi.
2018 jyly Shahtınsk qalasynda ónerkásip óndirisi aıtarlyqtaı ósti, bul kórsetkish 18,3 mlrd teńgege jetip otyr. Kómir óndirý 7% artty. Ekonomıkanyń damýyna jer qoınaýyn paıdalaný salasynda eki jańa ınvestjobanyń iske qosylýy da yqpal etti.
Qala ákimi turǵyn úı men áleýmettik salany damytý josparlary týraly aıtyp berdi. Onyń aıtýynsha, bıyl Shahtınskide qalpyna keltirilgen úılerdegi páterler dárigerlerge bólinedi. Bul medıtsınalyq mamandardyń tapshylyǵyn azaıtýǵa septigin tıgizbek.
Memlekettik-jekeshelik áriptestik baǵdarlamasy boıynsha qalada 100 oryndyq jańa balabaqsha ashý josparlanýda.
Memleket basshysynyń Qazaqstan halqyna Joldaýy aıasyndaǵy tapsyrmalaryn júzege asyrý týraly esep bere otyryp, qala basshysy qańtar aıynan bastap tarıfterdiń 4%-ǵa tómendegeni týraly habarlady.
Baıandamadan suraq-jaýapqa ótip, Serjan Aımaqov ınfraqurylymnyń joqtyǵyna shaǵymdanǵan "Joǵarǵy ortalyq-3" shaǵyn aýdanynyń turǵyndarynyń hatyn oqydy.
"Meniń oıymsha, bizdiń qalada shaǵyn aýdandar men oramdarǵa bólý - bul shartty uǵym, tarıhqa degen qurmet. Óz ýaqytynda Shahtınsk qalasy 100 myńdyq qala retinde josparlandy. Al búginde munda 37 myń adam turady. Ár shaǵyn aýdannyń óz artyqshylyqtary men kemshilikteri bar. Al, negizinen bizdiń mindetimiz-barlyǵyna qolaıly jaǵdaı jasaý" - dedi qala ákimi.
Ol bıylǵy jyly qalanyń bas josparyna ózgerister engiziletinin aıtty. Jańa egjeı-tegjeıli josparlaý jobasy atalǵan bólikke de qatysty bolady. Jer ýchaskelerin kásipkerler nysanaly maqsatyna sáıkes, aýktsıondarda satyp ala alady. Qala ákimi shahar qurylysy qujatyna turǵyndar qajet etetin nysandardy kirgizýge ýáde berdi.
Aýlalardy abattandyrý boıynsha kóptegen suraqtar qoıyldy. Qala basshysy mundaı baǵdarlama bar ekenin aıtty. Bılik jergilikti bıýdjetten túsken aqshaǵa barlyq aýlalardy retke keltirýdi josparlap otyr.
