Shahtınsk qalasynda turǵyn úıdegi gaz ballony jarylyp, 8 adam zardap shekti
QARAǴANDY. KAZINFORM – Qaraǵandy oblysy TJD-niń 112 pýltine polıtsııadan Shahtınsk qalasyndaǵy turǵyn úılerdiń birinde turmystyq gaz ballonynan gaz-aýa qospasynyń jarylysy bolǵany týraly habar tústi. Oqıǵa saldarynan 8 adam zardap shekti, onyń ishinde 5-eýi polıtsııa qyzmetkeri, dep habarlaıdy TJM baspasóz qyzmeti.
Habarlama kelip túskennen keıin 4 mınýt ishinde TJM kúshteri men quraldary oqıǵa ornyna jetken. Olar oqıǵa ornyna kelgen kezde jıhaz ben turmystyq zattar janyp jatqan.
Qutqarýshylardyń kúshimen baspaldaq arqyly joǵarǵy qabattardan 5 adam evakýatsııalanypty. Órt sóndirýshiler kelgenge deıin polıtsııa qyzmetkerleri de turǵyndardy evakýatsııalaǵan, qalǵan turǵyndar óz betinshe ǵımarattan shyqqan.
– Turǵyndar úshin TJM vahtalyq avtokóligin paıdalaný arqyly jylytý uıymdastyryldy. Sondaı-aq jylytý pýnkti ashyldy. Oqıǵa saldarynan 8 adam zardap shekti, onyń ishinde 5-eýi polıtsııa qyzmetkeri. Barlyǵy medıtsınalyq mekemege jetkizildi, – delingen resmı habarlamada.
TJM kúshterimen 40 sharshy metr aýmaqty sharpyǵan órt tolyq sóndirildi. Oqıǵanyń sebepteri men mán-jaılary anyqtalyp jatyr. Oqıǵa ornynda TJD bastyǵynyń jetekshiligimen órt sóndirý shtaby quryldy. Oqıǵa ornynda órt sóndirý bólimsheleri, qutqarý toptary, sondaı-aq medıtsına qyzmetkerleri, polıtsııa jáne jergilikti atqarýshy organdardyń ókilderi jumys istep jatyr.
Eske sala ketsek, Batys Qazaqstan oblysynda jyl basynan beri 123 órt tirkelip, sonyń saldarynan 9 adam kóz jumyp, taǵy ekeýi jaraqat aldy. Al qaza tapqan 9 adamnyń jeteýi mas kúıinde bolǵan.
