Shahtınsk avtopark aýmaǵynda avtobýs órtendi

ShAHTINSK. KAZINFORM - Avtokásiporyn aýmaǵynda avtobýs kenetten otqa oranyp, jalyn jaqyn turǵan kólikterge taraǵan. 

Birneshe mınýttyń ishinde jaǵdaı baqylaýdan shyǵyp ketýi múmkin edi, tyǵyz ornalasqan kólikter tizbekti órt qaýpin kúsheıtti. Alaıda qutqarýshylardyń jedel áreketiniń arqasynda aýqymdy saldardyń aldyn alý múmkin boldy.

13 sáýirge qaraǵan túni Qaraǵandy oblysynyń Shahtınsk qalasynda ornalasqan seriktestikterdiń biriniń aýmaǵynda avtobýs órtendi. Aldyn ala málimetterge sáıkes, jalyn jyldam tarap, qatar turǵan taǵy eki kólikke aýysqan.

Oqıǵa ornyna TJD bólimsheleri dereý jetti. Órt sóndirýshiler kúsh pen quraldardy jedel jumyldyryp, órt sóndirý oqpandaryn iske qosty. Órtti aýyzdyqtaý úshin aýa-mehanıkalyq kóbik qoldanylyp, bul jalyndy tıimdi túrde basyp, onyń ári qaraı taralýyna jol bermedi.

Órt sóndirýshilerdiń úılesimdi ári kásibı is-qımylynyń nátıjesinde tilsiz jaý nebári 16 mınýtta tolyq sóndirildi. Eń mańyzdysy — qutqarýshylar jaqyn mańda turǵan 12-den astam avtobýsty ottan aman alyp qalyp, kásiporyn aýmaǵyndaǵy ǵımarattyń zaqymdanýyna jol bermedi.

Mamandar eskertedi: avtokólik quraldarynda tótenshe jaǵdaı týyndaǵan jaǵdaıda 112 nómirine dereý habarlasý qajet.

Buǵan deıin Astanadaǵy turǵyn úı keshenderiniń birinde bolǵan órt saldarynan úsh balanyń qaza tapqany habarlanǵan edi.