Shahtınsk: Átkenshekte qyzdary mert bolǵan ata-ana 5 mln teńge óndirip aldy
ASTANA. QazAqparat - Úsh jylǵa jýyq ýaqyt buryn Qaraǵandynyń Shahtınsk qalasynda átkenshektiń astyna túsip, qaza tapqan eki jasar qyzdyń ata-anasy moraldyq shyǵyndy ótep alý úshin sotqa júgindi, dep habarlaıdy QazAqparat ekaraganda.kz saıtyna silteme jasap.
Varvara Peresedovanyń ata-anasy ótemaqyny «Barys» kommýnaldyq memlekettik qazynalyq kásiporny men qalalyq ákimdikten talap etken.
Sotta talapkerdiń ókili atap ótkendeı, Varvara Peresedova 2015 jyldyń 29 mamyrynda Shahtınsk ortalyq mádenıet jáne demalys parki aýmaǵyndaǵy «Aqqý» attraktsıonynda átkenshektiń ashyq turǵan qozǵaltqyshynyń astyna túsip ketip, alǵan jaraqaty saldarynan Shahtınsk ortalyq aýrýhanasynyń jansaqtaý bóliminde sol kúni qaza tapty. Osy fakti boıynsha sotqa deıingi tergeý jumystary júrgizilip, ol eki jyldan astam ýaqytqa sozylǵan edi.
Eki jasar Varvara Peresedovtar otbasyndaǵy 12 jyldan keıin dúnıege kelgen kópten kútken ári jalǵyz bala bolǵan. Qyzdary qaza tapqannan keıin erli-zaıyptylar uzaq ýaqyt boıy psıhologtardyń kómegine júgingen.
Osyǵan baılanysty, olar sottan 2 528 874 teńge kóleminde materıaldyq shyǵyn, 15 000 000 teńge kóleminde moraldyq zııan, sondaı-aq sot shyǵyndaryn óndirip berýdi suraǵan.
Jaýapkerlerdiń ókilderi sotta kinálaryn moıyndamady.
Sotta talap-aryz jartylaı qanaǵattandyryldy. Varvara Peresedovanyń ata-anasynyń paıdasyna «Barys» KMQK-dan 230 myń teńge kóleminde materıaldyq zııan jáne olardyń árqaısysyna 2 500 000 kóleminde moraldyq zalal, sondaı-aq sot shyǵyndarynyń bir bóligin óndirý týraly úkim shyǵaryldy.
Shahtınsk qalasyndaǵy saıabaqta jumys istep turǵan átkenshektiń astyna túsip, mert bolǵan 2 jasar qyz týraly buǵan deıin habarlaǵan bolatynbyz.
