Shahterlerdiń zeınetke shyǵý jasy tómendeýi múmkin

ASTANA. QazAqparat – Elimizde shahterlerdiń zeınetke shyǵý jasy qaıta qaralyp, naqtylanyp jatyr. Bul týraly Eńbek jáne halyqty áleýmettik qorǵaý mınıstri Tamara Dúısenova málim etti, dep habarlaıdy QazAqparat tilshisi.

«Biz bul máseleni qarastyramyz. Sebebi zııandy eńbek jaǵdaılary bar, bul oraıda halyqaralyq tájirıbege súıenemiz. Mysaly, 15 jylǵa deıin zııandy jaǵdaıda jumys isteýge bolady. Odan ári densaýlyqqa zııan keltirmeýi úshin basqa jumysqa aýysýy kerek. Biz qazir shahterlerdiń áleýmettik qamsyzdandyrylýyna áser etetin jumystyń shekti kezeńin naqtylap jatyrmyz», - dedi Tamara Dúısenova Úkimet otyrysynan keıin BAQ ókilderiniń saýalyna jaýap bere turyp.

Sondaı-aq, vedomstvo basshysy shahterlerdiń 63 jasqa deıin jumys isteýi múmkin emestigimen kelisitinin aıtty.

Aıta keteıik, osy ýaqytqa eńbek daýlary men janjaldaryn sheshý tártibin ońaılatatyn zań qoldanysqa engenin jazǵan bolatynbyz.