«Shahter» fýtbol komandasy Birinshi lıgada ekinshi orynǵa kóterildi

ASTANA. KAZINFORM - Fýtboldan Birinshi lıga komandalary arasyndaǵy Qazaqstan chempıonatynyń ІH týrynda qaraǵandylyq «Shahter» jeńiske jetti. 

Kenshiler bıyl Qazaqstan Premer-lıgasynv qaıta oralýdy alyna maqsat etip otyr. Sondyqtan árbir oıynda jeńiske jetýge bar kúshin salyp keledi. Soǵan qaramastan keıingi 5 týrda eki márte teń túsip, bireýinde jeńilip qalsa, bireýinde ǵana úsh upaı oljalady. 

Búgin olar óz alańynda almatylyq AKAS komandasyn qabyldady. Oıynnyń bastapqy kezeńinde Alataý baýraıynan kelgen fýtbolshylardyń belsendiligi baıqaldy. Dese de «Shahter» sapynan Aıdos Táttibaev 4-mınýtta esep ashty. Oǵan almatylyq klýbtan Sherzat Pirimberdıev 11, Arýp Saýtov 13-mınýtta eki golmen jaýap berdi.
Al Aıdos Táttibaev 40-mınýtta taǵy márte mergendik tanytyp, tarazy basyn teńestirdi.

Ekinshi kezeńde «Shahter» sapynan Oljas Kerimjanov 51, Almas Núsip 76-mınýtta gol soǵyp, qorytyndy esepti belgiledi.

Osylaısha qaraǵandylyq klýb qarsylasynan 4:2 esebimen basym túsip, týrnır kestesinde 20 upaımen ekinshi orynǵa kóterildi. 

Dál qazir «Qaırat-2» (Almaty) men «Jetisaı» (Túrkistan oblysy) kezdesýiniń birinshi kezeńi aıaqtaldy. Ázirge almatylyq klýb 1:0 esebimen alda keledi. 

Sondaı-aq atalǵan týrdy búgin «Ertis» (Pavlodar) men «Kaspıı» (Aqtaý) komandalary túıindeıdi. 

12 maýsymda óz alańynda «Aqtóbe-2» Shymkenttiń «Akademııa Ońtústik» klýbynan 1:2, astanalyq «SD Family» Óskemenniń «Altaıynan» 0:1 esebimen jeńilip qalsa, Pavlodar oblysynyń «Ekibastuzy» «Tarazdan» 4:1, almatylyq «Han táńiri» (Almaty) «Túrkistannan» 4:3 esebimen basym tústi.