Shahtadaǵy eńbek qaýipsizdigi talaptary kúsheıtilýi kerek - Senat spıkeri

ASTANA. QazAqparat – Senat tóraǵasy Máýlen Áshimbaev Qaraǵandy oblysynda bolǵan shahtadaǵy apattan keıin elimizdegi óndiristerde eńbek qaýipsizdigi talaptaryn kúsheıtýge qatysty pikir bildirdi, dep habarlaıdy QazAqparat tilshisi.

«Shahtada qaza bolǵan kenshilerdiń otbasylaryna, jaqyndaryna depýtattardyń atynan qaıǵyryp kóńil aıtamyz. Bul – úlken tragedııa. Memleket basshysy Úkimetke jáne Qaraǵandy oblysynyń ákimine apat sebepterin anyqtaý jáne qaıtys bolǵandar men zardap shekken azamattardyń otbasylaryna tıisti kómek kórsetýdi tapsyrdy. Atap aıtqanda, tıisti komıssııa jumysynyń nátıjesin kútemiz. Qajet bolǵan jaǵdaıda, tıisti zańdarǵa ózgerister engizýge daıynbyz», - dedi M. Áshimbaev Senattyń jalpy otyrysynan keıin tilshiler saýalyna jaýap bere otyryp.

Senat tóraǵasy qazirgi kezde qoǵam shahtalarda apatqa jol bermes úshin tıisti sheshimder qabyldaýdy talap etip otyrǵanyn atap ótti.

«Osy oraıda, eńbek qaýipsizdigi máselesi eń basty taqyryp retinde shyǵyp otyr. Bul qaıǵyly oqıǵa ne sebepti boldy? Endi onymen komıssııa aınalysady. Sodan keıin biz múddeli memlekettik organdardyń ókilderin, mınıstrlik basshylaryn tyńdaımyz. Bul turǵyda zańnamany kúsheıtetin tustaryn qarastyramyz. Qajet bolsa, óndiristegi qaýipsizdikti qamtamasyz etý baǵytynda jaýapkershilikti kúsheıte túsemiz», - dedi Senat tóraǵasy.

Esterińizge sala keteıik, búgin túnde «ArselorMıttal Temirtaý» AQ Kómir departamentiniń Lenın atyndaǵy shahtasynda apat bolyp, 5 kenshi qaza tapty.

Qaraǵandy oblysynyń ákimdigi qaza bolǵandardyń tizimin jarııalady.

«ArselorMıttal Temirtaý» AQ KD «Lenın atyndaǵy» shahtasynda bolǵan apatqa baılanysty Úkimettik komıssııa quryldy.

Foto: minval.az