Shahtadaǵy apat: Eki kenshige ota jasalǵaly jatyr

QARAǴANDY. QazAqparat - Dárigerler Lenın atyndaǵy shahtada bolǵan apattan zardap shekkenderdiń qal-jaǵdaıy týraly aıtyp berdi, dep habarlaıdy QazAqparat tilshisi.

Lenın shahtasynda apattan zardap shekken tórt adam da professor H.J. Maqajanov atyndaǵy kópsalaly aýrýhanaǵa jetkizildi. Eki kenshi operatsııaǵa daıyndalýda, qalǵandarynyń jaǵdaıy turaqty.

«Zardap shekken eki adam mıdyń ashyq jaraqatyn alǵan jáne gazdan ýlanǵan. Ekeýi de operatsııaǵa daıyndalýda. Ony bir saǵat ishinde ótkizý josparlanýda. Olar esin biledi, alaıda jaǵdaılary aýyr. Jaraqattyń aýyrlyǵyn eskere otyryp, boljam jasaý erte», - dedi H.J. Maqajanov atyndaǵy aýrýhananyń medıtsınalyq bólimi dırektorynyń orynbasary Talǵat Júken.

Zardap shekken eki adam toksıkologııa bóliminde. Olar metan men kómirtegi totyǵymen aýyr túrde ýlanǵan. Jaǵdaılary turaqty.

Osyǵan deıin Shahtınsk qalasyndaǵy aýrýhanaǵa konsılıým ótkizý úshin sanavıatsııamen quramynda 2 neırohırýrg jáne 2 reanımatolog bar Maqajanov atyndaǵy kópsalaly aýrýhana mamandarynan quralǵan brıgada kelip jetkeni týraly habarlanǵan bolatyn.

Esterińizge sala keteıik, búgin túnde shahtad «ArselorMıttal Temirtaý» AQ Kómir departamentiniń Lenın atyndaǵy shahtasynda apat bolyp, saldarynan 5 kenshi qaza tapty.

TJ faktisi boıynsha QR QK 277-babynyń 3-bóligi boıynsha qylmystyq is qozǵaldy.