Shahtadaǵy apat boıynsha 18 adam qamaýǵa alyndy
ASTANA. QazAqparat - Túrkııanyń batysynda shahtada bolǵan apat boıynsha isti tergep jatqan polıtsııa 18 adamdy qamaýǵa aldy.
Belgili bolǵandaı, olardyń arasynda shahtany basqarǵan kompanııanyń basshylary da bar. Bul týraly túrkııalyq BAQ habarlady. Soma qalasyndaǵy shahtada qutqarý sharalary sońǵy eki shahterdiń denesi joǵary shyǵarylǵannan keıin senbi kúni aıaqtaldy. Esterińizge sala keteıik, seısenbi kúni Ystambuldan 200 shaqyrym qashyqtaǵy Soma eldi mekenindegi kómir shahtasynda gaz qospasy jaryldy. Aldyn ala málimetterge sáıkes, shamamen 2 shaqyrymdyq tereńdikte elektr symynyń qysqa tuıyqtalýy saldarynan durys jumys istemeı turǵan transformator jarylǵan. Dál osy kezde jer astynda 787 adam bolǵan. Sońǵy derekterge sáıkes apat saldarynan 301 shahter qaza tapqan.
