Shahtadaǵy apat: Ulytaý jáne Qaraǵandy oblystary TJD kúshteri oqıǵa ornynda
JEZQAZǴAN. KAZINFORM – Kenishtegi TJ saldaryn joıýǵa kómek kórsetý úshin qosymsha «ASS Serıktes» JShS qutqarýshylar toby jiberildi.
Ulytaý jáne Qaraǵandy oblystary TJD kúshteri men quraldary oqıǵa ornynda.
- TJM komandalyq ortalyǵynyń, Ulytaý oblysy TJD bazasynda jáne oqıǵa ornynda jedel shtabtar jumys isteıdi. Aqparat alý úshin «jedel jeli» jumysy uıymdastyryldy: 8 (7172) 55-96-21, - delingen QR TJM habarlamasynda.
TJM Komandalyq ortalyǵynda beınekonferentsııalyq baılanys arqyly avarııalyq-qutqarý jumystary boıynsha jedel shtabtardyń is-qımyldary úılestirildi.
Tótenshe jaǵdaılardyń aldyn alý komıtetiniń tóraǵasy Serik Júnisbekov, Ulytaý oblysy TJD bastyǵy Esen Baıyrov, ónerkásiptik qaýipsizdik komıteti tóraǵasynyń orynbasary Keńgirbaı Eseneev oqıǵa ornynda.
Esterińizge sala keteıik, búgin saǵat 16:50-de Ulytaý oblysyndaǵy shahtada apat bolyp, 7 adam tótenshe jaǵdaıda qaldy.
Oqıǵa ornyna jedel járdem brıgadalary jóneltildi. Kabelderdiń úzilýine baılanysty jumysshylarmen baılanys joq. Shahtada qalǵan jumysshylardyń tizimi belgili boldy.
Ulytaý oblysynda shahtanyń opyrylýyna baılanysty úkimettik komıssııa qurylǵan edi.