Shahtadaǵy apat: Ózbekstan prezıdenti qazaqstandyqtarǵa kóńil aıtty

Ózbekstan basshysy Shavkat Mırzıeev Qaraǵandy oblysynda ornalasqan Kostenko atyndaǵy shahtada bolǵan qaıǵyly oqıǵaǵa baılanysty Qazaqstan prezıdentimen telefon arqyly sóılesti, dep habarlaıdy Kazinform.

Qazaqstan Prezıdentimen habarlasqan Shavkat Mırzıeev osy oqıǵanyń saldaryn joıý úshin qajetti kómek kórsetýge daıyn ekenin aıtty.

«Ózbekstan prezıdenti shahtada qalǵan kenshilerdi tezirek qutqarýǵa úmittenetinin jáne osy oqıǵanyń saldaryn joıýǵa qajetti kómek kórsetýge daıyn ekenin aıtty», - delingen atalǵan el basshysynyń resmı saıtynda.

Sondaı-aq telefon arqyly ekijaqty jáne óńirlik kún tártibindegi ózekti máseleler talqylanǵan.

Eske salaıyq, 28 qazan, túngi saǵat 02.33-te Qaraǵandy oblysyndaǵy Kostenko atyndaǵy shahtada órt boldy. Saǵat 17.33-tegi málimet boıynsha 33 kenshiniń denesi tabyldy,13 adam izdestirilip jatyr. 20 jumysshy aýrýhanaǵa jetkizildi. 

"ArselorMıttal Temirtaý" AQ-ǵa tıesili 8 shahtanyń jumysy ýaqytsha toqtatyldy.

Keshqurym brıfıng ótkizgen Tótenshe jaǵdaılar mınıstri Syrym Sháriphanov jer astynda qalǵan kenshilerdi tiri tabýǵa úmit óte az ekenin málim etti.

Kásibı áskerılendirilgen apattyq-qutqarý qyzmetteriniń respýblıkalyq ortalyq shtaby Qaraǵandy fılıaly dırektorynyń orynbasary Jumat Ókenov mert bolǵan kenshilerdiń jeke basyn anyqtaý qıynǵa túsip jatqanyn aıtty.

Prezıdent Q.Toqaev 29 qazandy jalpyulttyq aza tutý kúni etip jarııalaıtyn Ókimge qol qoıdy.

Memleket basshysy Qasym-Jomart Toqaev Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatý týraly tapsyrma berdi. Keıin Úkimettiń baspasóz qyzmeti «ArselorMıttal Temirtaý» AQ-nyń menshik quqyǵyn QR menshigine qaıtarý týraly kelisimsharttyń aıaqtalýǵa jaqyn ekenin málim etti.

QR Úkimeti apattan qaza tapqandardyń otbasylaryna qandaı kómek kórsetiletinin jarııalady. 

Apatqa baılanysty Reseı, Belarýs, Qyrǵyzstan, Frantsııa prezıdentteri men Túrkııa Syrtqy ister mınıstrligi kóńil aıtty.

Kazinform «ArselorMıttalTemirtaý» tarıhynda qandaı apattar bolǵany týraly sholý usynǵan bolatyn.