«Shahnama» dastany musylmandar kúntizbesiniń mazmunyna aınalmaq
ASTANA. 18 jeltoqsan. QazAqparat - Álemdegi eń áıgili Islam murajaılardyń biri sanalatyn Beıt ál-Quran («Quran úıi») asyl dinimizdiń mınıatıýra ónerine arnalǵan kúntizbe shyǵardy. Al, kúntizbeniń mazmunyna álem ádebıetiniń jaýhary - «Shahnama» dastany arqaý bolǵan eken. Bezendirilgen qoljazba murajaıdyń irgetasyn qalaǵan doktor Ábdilátip Jasımma Kanýdyń kollektsııasynda saqtaýly tur. Bul týraly muslim.kz saıty jazady.
Quny 3 dınarlyq atalmysh kúntizbeni satýdan túsken qarjy murajaıdyń kerek-jaraǵyna, ónerge týyndylaryn satyp alýǵa, dáris júrgizýge jáne baspa qyzmetine jumsalatyn kórinedi. «Quran úıi» Bahreın, Parsy shyǵanaǵy turǵyndarynyń jáne ónerge beı-jaı qaramaıtyn álem jurtshylyǵynyń sadaqasynan 1990 jyly qurylǵan bolatyn. Murajaı dırektory Samar ál-Ǵaılanı kúntizbe maketi bıyl jasalǵanyn jáne ony doktor Kanýdyń ózi óńdegenin jetkizedi. Sondaı-aq, ıslam mınıatıýrasyna qatysty óner túri H ǵasyrda Baǵdat shaharynda paıda bolyp, Mosýlde damyǵanyn tilge tıek etti. Ýaqyt óte kele ol musylman elderine keńinen tarap, Iranda, Túrkııada jáne Úndistanda mektepteri ashylǵanyn aıta ketý kerek. Al Fırdoýsıdiń qalamynan týǵan «Shahnamanyń» ıllıýstratsııasy da osynaý óner túriniń sharyqtaı damyǵan dáýirine tuspa-tus keledi.
