Shahmurat Mútálip: Mektep baǵdarlamasyna boksty engizý úshin usynys ázirlep jatyrmyz
ASTANA. KAZINFORM – Elimizde boksty ulttyq sport retinde damytý úshin 10 jyldyq strategııalyq jospar ázirlenip jatyr. Bul týraly «Jibek Joly» telearnasynyń «Ýáde» baǵdarlamasyna suhbat bergen Qazaqstan Boks federatsııasynyń prezıdenti Shahmurat Mútálip aıtty.
- Sport jáne týrızm mınıstrligimen, óńirlik dene shynyqtyrý jáne sport basqarmalarymen tyǵyz, úılesimdi jumysty qolǵa alýymyz qajet. Búginde bul jumys istelinip jatyr. Sonymen qatar aldaǵy 10 jylǵa arnalǵan strategııalyq jospar daıyndalady. Boksty ulttyq sport deńgeıine kóterý úshin ınfraqurylymdy jańǵyrtý, óńirlerde sport mektepterin ashý, olardy materıaldyq-tehnıkalyq jabdyqtaý, jattyqtyrýshylardy, tóreshilerdi daıyndaý jumystary qolǵa alyndy, - dedi Shahmurat Mútálip.
Ol aýyldyq jerlerde boks mektepteriniń tapshylyǵy baıqalatyndyǵyn aıtyp, ony sheshý jolyn atady.
- Búginde elimizde 8 myńnan astam mektep bar. Sol mektep baǵdarlamasyna boksty engizý týraly usynys daıyndap jatyrmyz. Boksqa buqaralyq sport retinde qaraıtyn bolsaq, negizi kóp qarajat qajet etpeıdi. Materıaldyq-tehnıkalyq jabdyǵyn, bárin eseptegende kóp aqsha emes. Eger 8 myń mektepti qamtyp, baǵdarlamasyna engizsek, onda bul suraq sheshimin tabady, - dedi federatsııa prezıdenti.
Aıta keteıik, Anglııadaǵy dúbirli dodada Qazaqstan quramasy 7 altyn, 1 kúmis jáne 2 qola medal jeńip alyp, jalpykomandalyq esepte birinshi orynǵa ıe bolǵan edi.
Prezıdent bokstan Álem chempıonatynda top jarǵan boksshylardy quttyqtady.
