Shahmurat Mútálip: qazaqstandyq boksshylar IBA týrnırlerine qatysady

ASTANA.KAZINFORM — Qazaqstan boks federatsııasynyń prezıdenti Shahmurat Mútálip qazaqstandyq boksshylardyń Halyqaralyq boks qaýymdastyǵy (IBA) ótkizetin týrnırlerge qatysýy týraly pikir bildirdi.

Shahmurat Mútálip eń áýeli Qazaqstan boks federatsııasy byltyr Dúnıejúzilik boks uıymyna (World Boxing) mushe bolǵanyn eske saldy.

— Ózderińizge málim, World Boxing uıymy qazirgi ýaqytta Halqaralyq olımpıada komıteti tarapynan maquldanǵan uıym bolyp tabylady. Al biz byltyrdan bastap osy uıymnyń múshesi boldyq. Sol sebepti, biz ózimizdiń barlyq is-áreketimizdi osy uıymmen talqylap, olardyń kelisimi boıynsha jumys atqaramyz, — dedi QBF prezıdenti.

Onyń aıtýynsha, World Boxing uıymy qazaqstandyq boksshylardyń IBA týrnırlerine qatysýyna qarsy emes.

— Búgingi tańda, uıym bizdiń sportshylardyń IBA týrnırlerine qatysýyna qarsy emes. Bolashaqta ol jaǵy qalaı bolary áli belgisiz. World Boxing uıymy jańa qurylǵandyqtan, týrnırlik kesteler jáne jarystar endi bekitilip jatyr. Mysaly, bıylǵy jyly týrnırler sany aıtarlyqtaı kóbeıip, álem kýbogy jáne álem chempıonaty uıymdastyrylyp jatyr. Meniń oıymsha, qazaqstandyq sportshylar tájirıbe almastyrý maqsatynda IBA týrnırlerine qatysýynda eshteme turǵan joq, — deıdi Shahmurat Mútálip.

QBF prezıdenti qazirgi ýaqytta qazaqstandyq boksshylardyń Shrı-Lanka astanasy Kolombo qalasynda ótip jatqan 22 jasqa deıingiler arasynda Azııa chempıonatynda óner kórsetip jatqanyn aıtty.

— Biz IBA uıymdastyryp jatqan jarystarǵa qatysyp jatyrmyz. Mysalǵa, Shrı-Lankada 22 jasqa deıingiler arasynda Azııa chempıonatyna elimizdiń rezerv quramasy qatysyp jatyr. Osyndaı halqaralyq týrnırler bizdiń sportshylardyń tájirıbe almasýyna septigin tıgizedi, — dedi Shahmurat Mútálip.

Eske sala keteıik, búgin elordadaǵy «Qazaqstan» jeńil atletıkalyq sport kesheninde QR boks federatsııasynyń jyldyq konferentsııasy ótti.

Osyǵan deıin habarlaǵanymyzdaı, bokstan Álem kýbogy 30 maýsym — 6 shilde aralyǵynda Astana qalasynda ótedi.