Shahmurat Mútálip qaza tapqan áskerılerdiń otbasyna 25 mln teńgeden kómek kórsetedi

Qazaqstan Halyq Keńesiniń múshesi qaza tapqandardyń týǵan-týystaryna jáne qarýlas joldastaryna kóńil aıtty. Onyń sózinshe, áskerı qyzmetshilerge beriletin kómek ataýly túrde, memlekettik qoldaýǵa qosymsha kórsetiledi.

— Búgin Kaspııdegi oqý-jattyǵý kezinde áskerı qyzmetshilerimiz qaza tapty. Memleket basshysy marqumdardyń otbasyna kóńil aıtyp, olarǵa barlyq qajetti kómek kórsetýdi tapsyrdy jáne erteńgi kúndi jalpyulttyq aza tutý kúni dep jarııalady. Eń aldymen Qazaqstan Halyq Keńesiniń múshesi retinde, sondaı-aq kásipker retinde osynaý qaıǵyny teńdeı bólisýdi paryzym dep sanaımyn. Prezıdent Qasym-Jomart Kemeluly Toqaevtyń úndeýin qoldaı otyryp, Integra Construction KZ kompanııasynan qaza tapqan árbir áskerı qyzmetshiniń otbasyna 25 mıllıon teńgeden qarjylaı kómek bólinetinin habarlaımyn. Kómek ataýly túrde, memlekettik qoldaýǵa qosymsha kórsetiledi. Eshqandaı qarajat ata-anaǵa balasyn qaıtarmaıdy, árıne. Biraq mundaı sátte birde-bir otbasy óz qaıǵysymen jalǵyz qalmaýy kerek. Bizdiń elimiz qashanda osyndaı sátte óziniń birligin kórsetken. Qaza tapqandardyń týǵan-týystaryna jáne qarýlas joldastaryna kóńil aıtamyn, olarǵa sabyr men tózim tileımin, — dep jazdy Shahmurat Mútálip Instagram-daǵy paraqshasynda.

Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.

Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.

Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.

Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.

Budan bólek, Mańǵystaý oblysynda áskerı qyzmetshilerdiń qaza bolý sebepterin tergep-tekserý jónindegi úkimettik komıssııa quryldy. Komıssııa quramyna qorǵanys mınıstri, Mańǵystaý oblysynyń ákimi, Eńbek jáne halyqty áleýmettik qorǵaý, Tótenshe jaǵdaılar, Densaýlyq saqtaý, Kólik mınıstrlikteriniń basshylyǵy, Bas áskerı prokýror, sondaı-aq shekara qyzmetiniń ókilderi kirdi.

Premer-mınıstrdiń orynbasary Qanat Bozymbaev bastaǵan komıssııa Mańǵystaý oblysyna baryp, áli tabylmaǵan áskerı qyzmetshilerdi úzdiksiz izdestirýdi tapsyrdy.

Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.

Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.