Shahmattan jasóspirimder olımpıadasynda Qazaqstan quramasy tórtinshi oryndy ıelendi

ChORÝM. QazAqparat - Qazaqstannyń jasóspirimder quramasynyń otandyq shahmat tarıhyndaǵy eń jaqsy nátıjege qol jetkizdi. Túrkııanyń Chorým qalasynda ótken jasóspirimder olımpıadasynda Qazaqstan quramasy tórtinshi oryn aldy, dep habarlaıdy QazAqparat Qazaqstan shahmat federatsııasyna silteme jasap.

Jarysqa álemniń 48 elinen kelgen úzdik komandalar qatysty. Qazaqstan quramasy komandalyq esepte 9 oıynnyń bireýinde ǵana jeńilip, Ázerbaıjan, Ózbekstan jáne Belarýs komandalarynan upaı sany boıynsha utyldy.

«Iá, bul bizdiń jasóspirimder quramasynyń otandyq shahmat tarıhyndaǵy eń jaqsy nátıjesi, biraq biz odan da jaqsy oınaıtyn edik. Tek sáttilik jetkiliksiz boldy. Degenmen, bul jaqsy bastama ekenine senimdimin, endi bul orynnan aıyrylýǵa quqyǵymyz joq», - deıdi shahmattan Qazaqstan jastar quramasynyń jattyqtyrýshysy Ánýar Ismaǵambetov.

Ár komandadan 4 oıynshy qatysty: úsh ul jáne bir qyz. Qazaqstan quramasynan Qazybek Nógerbek, Bıbisara Asaýbaeva, Arystan Isanjýlov jáne Nurǵalı Nazerke qatysty. Aıta ketý kerek, Bıbisara ekinshi erler taqtasynda oınady.

«Bul Olımpıada óte mańyzdy boldy. Jeke jarysta qazaqstandyqtar 4 medal jeńip aldy. Qyzdar arasynda Nurǵalı Nazerke men Bıbisara Asaýbaeva 2 jáne 3-shi oryndardy ıelendi. Arystan Isanjýlov úshinshi taqtada úzdik atandy, al Nazerke Nurǵalı tórtinshi taqtada qola júldege ıe boldy», - deıdi Qazaqstan shahmat federatsııasynyń atqarýshy dırektory Irına Grışenko.