Shahmattan sensatsııa jasaǵan Álisher Súleımenov Pavlodardaǵy týrnırge keldi
Pavlodarda ótetin shahmat týrnırinde álem chempıony Magnýs Karlsendi jeńgen grossmeıster Álisher Súleımenov óner kórsetedi. Halyqaralyq deńgeıde ótetin týrnırde bes qurlyqtyń shahmatshylary baq synaıdy, dep habarlaıdy Kazinform.
Pavlodar — Álisher Súleımenovtiń alǵash shahmat oınap úırengen týǵan qalasy. Qazir grossmeıster nebári 23 jasta.
Bir apta buryn ǵana Álisher Dohada ótken týrnırde álemdik reıtıngtiń basynda turǵan norvegııalyq Magnýs Karlsenmen oınap, sensatsııalyq jeńiske jetti. Osy jeńisiniń arqasynda ol álem nazaryndaǵy eń myqty shahmatshylardyń birine aınaldy.
— Bizdiń kezdesýimiz jerebe arqyly anyqtaldy, men onymen jaı ǵana oınaıtynyma qýandym. Jeńý mańyzdy bolmady. Álemniń menmin degen myqty shahmatshylary oınaýdy armandaǵan Magnýspen kezdesý baqyty maǵan buıyrdy. Bir qyzyǵy partııa sonshalyqty qıyn bolǵan joq, óıtkeni Magnýs óti álsiz oınady. Men ár qadamymdy aqylǵa salyp, ádetten tys eshteńe jasamadym. Bylaısha aıtqanda, Magnýsty jibergen qatelikteri úshin jazalap qana otyrdym, — deıdi Álisher Súleımenov.
Bul — Álisher úshin mansabyndaǵy eń úlken jeńis. Buǵan deıin shahmatshy úshin ótken jyly Chennaı qalasynda ótken týrnırge qatysqany eń mańyzdy jetistik bolǵan. Ol kezde Qazaqstan erler quramasy 40-shy orynda bolyp, jeńiske úmiti az edi.
Týrnır barysynda qazaqstandyqtar reıtıngi áldeqaıda joǵary Ispanııa quramasymen kezdesti.
Sonda Álisher TOP-80 oıynshysyna qarsy oıynda senimdi túrde jeńiske jetti. Sonyń arqasynda Qazaqstan quramasy sensatsııamen ıspandyqtardan basym tústi.
Álisher shahmatqa kesh keldi: toǵyz jasynda ǵana tolyq oınaýǵa kiriskenimen, óz qatarlastaryn basyp ozdy.
— Negizi alty jasymda oınap bastadym, biraq ol kezde shahmatqa úlken qyzyǵýshylyq bolǵan joq. Bir-eki sabaq aldym da, jalǵastyrmaýdy jón kórdim. Keıin ákem men aǵamnyń oınaǵanyn jıi kóretinmin, solardy jeńgim keldi. Dosyma erip shahmatqa kezdeısoq keldim. Árıne, shahmatty alty jastan bastaǵan durys, men toǵyz jastan bastadym, biraq bir jylda basqalardy qýyp jetip, barlyq deńgeıdi aıaqtadym, — deıdi Álisher Súleımenov.
Qazir shyńdala túsý úshin ol kúnine bes saǵatty shahmat taqtasynda ótkizedi. Onyń ústine uzaq oıyndarda sharshap qalmaý úshin jattyǵý zalyna barady.
— Dene shynyqtyrýǵa kóp kóńil bólemin. Jattyǵý zalyna baryp, aptasyna on saǵat júıeli túrde jattyǵamyn, bul maǵan kóp kómektesedi. Shahmatta dene daıyndyǵy mańyzdy, óıtkeni biz 5-6, keıde 7 saǵat oıyn oınaımyz. Oıynnyń besinshi saǵatynda basyńyz aınalyp, álsirep ketýińiz múmkin, sondyqtan neǵurlym tózimdi jáne fızıkalyq turǵydan kúshti bolsańyz, soǵurlym jaqsy, — dep túsindiredi shahmatshy.
Qazir Álisher jalpy júlde qory 23 mln teńgeni quraıtyn «Pavlodar-OPEN 2023» halyqaralyq týrnırine qatysyp jatyr. Týrnırge 20 elden 230 sportshy kelgen.
Onyń ishinde 60-tan astam halyqaralyq dárejedegi sheberler men grossmeısterler bar. Týrnır 31 qazanda aıaqtalady. Jeńimpazǵa 4 mıllıon teńge beriledi.
Esterińizge sala keteıik, álemniń bes dúrkin chempıony Magnýs Karlsen Qatar Masters týrnırinde 23 jastaǵy qazaqstandyq grossmeıster Álisher Súleımenovten sensatsııalyq jeńilisin «qarsylasynyń qolyndaǵy saǵatyna baılanysty zeıinin joǵaltýymen» túsindirdi.
Vıdeoda Pavlodarda ótip jatqan týrnırde Pavlodar oblysynyń ákimi Asaın Baıhanov shahmatshynyń saǵatyna qatysty ázil aıtady.
