Shahmattan «Pavlodar - Open» týrnırinde 8 memlekettiń myqtylary baq synaýda
PAVLODAR. QazAqparat - Pavlodarda ártúrli jastaǵy shahmatshylarǵa arnalǵan «Pavlodar-Open» dástúrli týrnıri ótip jatyr, dep habarlaıdy pavlodarnews.kz .
On ekinshi ret uıymdastyrylyp otyrǵan «Pavlodar Open» týrnırine Reseı, Ýkraına, Belarýs, Qyrǵyzstan, Tájikstan, Serbııa, Mońǵolııa memleketterinen, sondaı-aq, elimizdiń ár óńirinen 100 sportshy qatysýda. Olardyń arasynda 20-dan astamy - tanymal halyqaralyq grossmeıstrler. Shahmat sheberleriniń eń jasy pavlodarlyq Kúnsulý Orazalına segizde bolsa, eń egdesi - 80 jastaǵy almatylyq Orazbek Qaldybaev.
«Jarys shveıtsarııalyq júıe boıynsha 10 kezeńnen ótedi», - deıdi halyqaralyq dárejedegi grossmeıstr, jarys tóreshisi Serikbaı Temirbaev.
«Sportshylar búgin týrnırdiń bel ortasyna keldi. Kil myqtyny anyqtaýǵa áli erte. Dástúrli týrnır halyqaralyq shahmat qaýymdastyǵymen moıyndalǵan mańyzdy báseke. Shahmatshylar deńgeılerin kóterip, halyqaralyq dárejedegi sheber men grossmeıster talaptaryn oryndaı alady. Jarystyń basty ereksheligi, jas erekshelikterine qaramaı jerebege saı qarsylas anyqtalýynda. Jarystaǵy eń egde sportshysy Orazbek Qaldybaev dástúrli týrnırge tórtinshi ret qatysyp otyr».
Jýyrda ǵana mereıli seksen jasyn atap ótken Orazbek Qaldybaev aqsaqal, shahmat básekesine durystap daıyndala almaǵandyǵyn jasyrmady. - Pavlodar óńiriniń shahmat federatsııasy elimizdegi eń myqty uıym dep esepteımin, - deıdi qart shahmatshy. - 12 jyl úzbeı salmaqty básekeni ótkizip keledi. Alys-jaqyn memleketterden kil myqty degen sportshylar jınalady. Bul - bizdiń jastarǵa tájirıbe jınap, jetilýine úlken mektep. Alaıda, elimizdiń shalǵaı óńiri batys, ońtústikten keletin shahmatshylardyń qatary az. Júlde qory úsh mıllıon teńge bolatyn týrnır 29 qarashada aıaqtalady. 100 shahmat sheberi ózara saıysqa túsip, jeńimpazdar marapattalady.
