Shahmattan Qazaqstan chempıony Nahbaeva: Bıyl el birinshiligine alǵash ret 4 grossmeıster qatysty
ALMATY. QazAqparat - Almatyda shahmattan áıelder arasynda ótken Qazaqstan chempıonatynyń jeńimpazy Gúlishan Nahbaeva bıylǵy el birinshiliginiń erekshe bolǵanyn aıtty, dep habarlaıdy QazAqparat tilshisi Qazaqstan Shahmat federatsııasyna silteme jasaı otyryp.
Bıylǵy el chempıonatynda 10 eń myqty degen shahmatshy qyz baq synady. Olar týrnır sharty boıynsha 9 týrdan ótti. Týrnırdiń 7-shi kezeńinen keıin aqtyq synda shymkenttik halyqaralyq áıelder grossmeısteri Gúlishan Nahbaeva kósh bastap, jeńiske jetti. Ol qajetti 9 upaıdyń 7,5-in jınaı aldy. Tarazdyq Mádına Dáýletaeva Gúlishannan jarty upaı ǵana qalyp, el chempıonatynyń kúmis júldegeri atandy. Úshinshi oryndy byltyrǵy chempıon, halyqaralyq sheber Jansaıa Ábdimálik jeńip aldy. Jansaıa týrnırde 6,5 upaı jınady.
«Oıyn týrnır sońyna deıin tartysty boldy. El chempıonatyna birinshi ret 4 grossmeıster qatysyp otyr. Meniń bilýimshe, bul Qazaqstandaǵy eń úzdik chempıonat. Men osymen 5-shi ret Qazaqstan chempıony atanyp otyrmyn. Men kúıeýge shyǵyp, qyzdy boldym, sondyqtan, eki jyl chempıonatqa qatyspadym. Bıyl qaıta sapqa qosyldym. Sońǵy týrda men chempıonattyń eń jas qatysýshysy Ámına Qaıyrbekovamen oınap, teń upaı jınadym. Bul meni qatty qobaljytty. Biraq, men jeńdim. Jyl ótken saıyn jeńiske jetý qıyndap barady. Chempıondyq tıtýldy birinshi ret jeńip alǵannan góri ony qorǵap qalý óte qıyn», - dedi el chempıony Gúlishan Nahbaeva.
Áıelder arasyndaǵy chempıonat aıaqtala salysymen erler arasyndaǵy báseke de bastalyp ketti. Onyń qorytyndysy 21 sáýir kúni belgili bolady. Bıylǵy erler chempıonatyna Qazaqstannyń úzdik shahmatshylary qatysyp otyr. Olar: Rınat Jumabaev, Mýrtas Qajǵaleev, byltyrǵy el chempıony Petr Kostenko, Ánýar Ismaǵambetov, Azamat Óteǵalıev, Kırıll Kýderınov jáne basqalar.
Aıta keteıik, bıylǵy el chempıonatynyń aqtyq synyna alǵash ret halyqaralyq sheber Dınara Sadýaqasova qatysyp otyr.
