Shahmattan Qazaqstan chempıonaty el tarıhynda alǵash ret onlaın ótedi
NUR-SULTAN. QazAqparat – Qazaqstandyq shahmat federatsııasy 24-26 naýryz aralyǵynda 8, 10, 12, 14, 16 jáne 18 jasqa deıingi uldar men qyzdar arasynda shahmattan Qazaqstan Respýblıkasynyń chempıonaty ótetindigin jarııalady, dep habarlaıdy QazAqparat tilshisi.
Qazaqstan chempıonatyna elimizdiń túkpir-túkpirinen 500-den astam jas shahmatshylar qatysatyn jyldyń eń basty oqıǵasy sanalady. Jarys Lichess.org oıyn alańynda ótedi. Al qatysýshylardyń baqylaý ZOOM platformasy arqyly júzege asady. Baqylaý ýaqyty 15 mınýt + 10 sekýnd (ár júris úshin, birinshi júristen bastap) ýaqyty beriledi. «Alaıaqtyqpen» kúresý úshin (týrnırge qatysýshylardyń kompıýterlik baǵdarlamalardy nemese úshinshi tarap keńesterin qoldanýy) týrnırge antıchıterlik komıssııasy qatysady jáne Fair Play Panel antıchıterlik baǵdarlamasy qoldanylady.
Onlaın chempıonat partııalarynyń tikeleı kórsetilimi Qazaqstan shahmat federatsııasynyń Youtube arnasynda qoljetimdi bolady, jarystyń kommentatory – tanymal halyqaralyq grossmeıster Murtas Qajyǵalıev.
Jarystyń jeńimpazdary men júldegerleri medaldarmen, dıplomdarmen jáne aqshalaı syılyqtarmen marapattalady. Jeńimpaz-sportshylardyń jattyqtyrýshylaryna aqshalaı syılyq belgilengen. Jarystyń jalpy júlde qory 1,8 mln teńge.
«Qazaqstan chempıonaty elimizdegi eń mańyzdy shahmat oqıǵasy. Aldaǵy chempıonattyń barlyq qatysýshylary óz aımaqtarynda muqııat irikteýden ótti. Ár sanattaǵy altyn medal ıegerleri onlaın Álem chempıonatyna qatysý quqyǵyna ıe bolady», – dedi Qazaqstan Shahmat federatsııasynyń prezıdenti Beıbit Atamqulov.
Jarysty uıymdastyrýshylar – Qazaqstan Shahmat federatsııasy, QR Mádenıet jáne sport mınıstrliginiń Sport jáne dene shynyqtyrý isteri komıteti.
