Shahmattan Azııa chempıonaty: Medaldardyń barlyq toptamasyn qazaqstandyqtar ıelendi
NUR-SULTAN. QazAqparat – Qazaqstandyq shahmatshylar senorlar arasyndaǵy Azııa chempıonatynda rapıdten úzdik úsh orynnyń barlyǵyn jeńip aldy, dep habarlaıdy QazAqparat Qazaqstannyń Shahmat federatsııasyna silteme jasap.
«Týrnırdiń alǵashqy kúninen qazaqstandyqtar úzdik nátıje kórsetti. Biraq bul tek rapıd qana, al klassıkalyq shahmattyń naǵyz tartystary áli alda», - deıdi chempıonattyń bas tóreshisi Oleg Rınas. 50 jastan úlkender arasynda Serikbaı Temirbaev altyn medal aldy, Oleg Golovchýk - ekinshi, Valerıı Mın úshinshi oryndy ıelendi.
65 jastan asqandar arasynda Tólegen Nýkın - altyn, Marat Pirimbetov - kúmis, Hanıf Qusaıynov qola júldeger atandy.
Áıelder arasynda pavlodarlyq Elena Ankýdınova 50-den asqandar arasynda aldyna jan salmady, ekinshi oryndy jańa zelandııalyq Helen Mıllıgan ıelendi. 65-ten asqan áıelder arasynda altyn medal Nadejda Iskıchekovaǵa buıyrdy.
«Búgin klassıkanyń birinshi týry bastalady. Onda sportshylardan erekshe zeıin men tózim talap etiledi», - deıdi QShF atqarýshy dırektory Irına Grışenko.
Jalpy, Azııa chempıonatyna 16 eldiń 70 shahmatshysy qatysýda. Doda 18 qyrkúıekke deıin jalǵasady.
