Shahmattan álem chempıony atanǵan Bıbisara Asaýbaeva qazaqstandyqtarǵa alǵys aıtty
«Bir ózenge ekinshi márte túse almaısyń degen sóz bar. Degenmen ol ózen, al bul shahmattan álem chempıonaty. Onyń ústine chempıonat otanym – Qazaqstanda ótti. Chempıondyqty saqtap qalyp, ekinshi ret shahmattan blıts boıynsha áıelder arasynda álem chempıony ataný – úlken jaýapkershilik. Meniń qolymnan keldi. Bul joly 13 sany jeńis ákeldi, men osynsha upaı jınap, birinshi orynǵa ıe boldym.
Menen «Jeńiske jetýdiń basty qaǵıdasy ne?» dep jıi suraıdy. Aıtarym, bul jerde bári mańyzdy. Daıyndyqtan bastap, psıhologııalyq turǵydan ázir bolý, jaqyndarym men jankúıerlerdiń qoldaýyna deıin», - dep jazdy Bıbisara Asaýbaevva Instagram-paraqshasynda.
Shahmatshy qyz bul jolǵy daıyndyqty ǵaryshqa saparǵa ázirlikpen teńedi.
«Anam úzdik jattyqtyrýshylarmen daıyndyq uıymdastyrdy. Kúndelikti tyńǵylyqty daıyndaldym, sońynda... aýyryp qaldym. Jarys kúnderi ystyǵym joǵary boldy. Kóńil-kúı tústi. Biraq, anashym der kezinde qoldaý kórsetti. «Sara, bári oıdaǵydaı bolady»,- dedi anam. Aıtqany keldi. Anam ne aıtady rasynda solaı bolady. Men baqyttymyn, shahmattan álem chempıonatynyń Qazaqstanda ótkenine qýanyshtymyn. «Altyndy» týǵan jerimde qaldyrdym», - deıdi álem chempıony.
Jas álem chempıony kezekti jeńisin ata-anasyna arnaıdy.
«Maǵan senim artqandarǵa alǵysym sheksiz. Meni qoldaǵan, jeńiske jetýde jigerlendirgen barsha qazaqstandyqtarǵa, shahmatshylar men jankúıerlerge alǵys aıtamyn. Sizderdi qurmetteımin. Qoldaýsyz qıynǵa túser edi», - dedi Bıbisara Asaýbaeva.
Aıta keteıik, keshe 18 jastaǵy qazaqstandyq shahmatshy Bıbisara Asaýbaeva Almatyda ótken blıtsten álem chempıonatynda jeńimpaz atandy.
Ony aıtýly jeńispen Prezıdent Qasym-Jomart Toqaev quttyqtady.
Foto: www.instagram.com/kzchessfederation