Shahmattan álem chempıonatynda qazaqstandyqtar 5 medal jeńip aldy
NUR-SULTAN. QazAqparat – Shahmattan álem chempıonatynda qazaqstandyq jastar 5 medaldy jeńip aldy, dep habarlaıdy QazAqparat Qazaqstan Shahmat federatsııasynyń Facebook paraqshasyna silteme jasap.
«Grekııadan keremet jańalyq keldi! 18 jasqa deıingi jastar arasyndaǵy rapıdten álem chempıony atanǵan FIDE sheberi Qazbek Nógerbek bul joly Qazaqstan qorjynyna blıts shahmattan altyn medal saldy. Blıtsten 18 jasqa deıingi qyzdar arasyndaǵy álem chempıonatynda 17 jastaǵy shahmatshy, áıelder arasyndaǵy halyqaralyq sheber Nazerke Nurǵalı altynnan alqa taqty. 14 jasqa deıingi uldar arasyndaǵy jarysta kúmis júlde keshe rapıdten qola júldeger atanǵan Danııal Sápenovke buıyrdy»,-delingen habarlamada.
«Kadetter arasyndaǵy jyldam jáne óte jyldam shahmattan álem birinshiliginde qazaqstandyqtar 3 altyn, 1 kúmis jáne 1 qola medal jeńip aldy. Bizdiń chempıondarymyzdy, olardyń jattyqtyrýshylaryn, ata – analaryn jáne olardyń tabysty óner kórsetýine yqpal etkenderdi quttyqtaımyn!» - dedi qazaqstandyq shahmat federatsııasynyń Atqarýshy dırektory Anýar Ismaǵambetov.
