Shahmattan ÁCh: Qazaqstandyq sportshylar 2 «altyn», 4 «kúmis» jeńip aldy

ASTANA. QazAqparat – Grýzııanyń Batýmı qalasynda rapıd jáne blıts shahmattan kadetter men jastar arasyndaǵy álem chempıonaty óz máresine jetti, dep habarlaıdy QazAqparat tilshisi.

Sportty damytý dırektsııasynan málim etkendeı, shveıtsarııalyq júıe boıynsha 11 raýndtan turatyn bul bəsekege 35 elden kelgen 450-den astam oıynshy qatysty.

6 kúnge sozylǵan týrnırde Qazaqstan quramasynyń órenderi 2 altyn jáne 4 kúmis medal jeńip aldy.

Əýeli jas oıynshylar shahmatttyń rapıd túrinen synǵa tústi. Munda Alanna Berikqyzy (10 jasqa deıin), Aıarý Altynbek (U-12) pen Zarına Nurǵalıeva (U-14) óz jas sanatynda 2-orynnan kórindi.

Keıin shahmatshylar blıtste sheberlik baıqasty. Bul rette Batýmıge barǵan eń jas otandasymyz Iman Nəbıev (8 jasta) kúmis medal jeńip aldy. Ol tek shotlandııalyq Lýıs Chengke ese jiberdi. Al Aıarý Altynbek (U-12) pen Zarına Nurǵalıeva (U-14) qarsylas shaq keltirmeı, chempıon atandy. Jýyrda ǵana klassıkalyq shahmattan 9 jasqa deıingi oıynshylar arasynda əlem chempıony atanǵan Alanna Berikqyzy bul synda úzdik bestikti túıindedi.