Shahmattan 8-18 jas aralyǵyndaǵy ul-qyzdar arasynda QR chempıondary anyqtaldy
KÓKShETAÝ. QazAqparat - Aqmola oblysynda balalar arasyndaǵy shahmattan Qazaqstan chempıonaty ótti, dep habarlaıdy «QazAqparat» HAA tilshisi Óńirlik kommýnıkatsııalar qyzmetine silteme jasap.
Şýche qalasyndaǵy «Zelenyı bor» shıpajaıynda uıymdastyrylǵan jarysqa elimizdiń ár óńirinen kelgen 8 jáne 18 jas aralyǵyndaǵy 440 bala qatysty. Magnýs Karlsen men Anatolıı Karpovtyń izbasarlary alty topqa bólinip, baq synady.
«Osy jarysta chempıon atanǵandar Brazılııa jáne Ýrýgvaı elinde ótetin álem chempıonatyna Qazaqstan quramasy sapynda qatysady. Al, kúmis júldegerler otandyq Shahmat federatsııasynyń qoldaýymen Ózbekstanda ótetin Azııa chempıonatynda el namysyn qoǵaıtyn bolady», - dedi Qazaqstan Shahmat federatsııasynyń atqarýshy dırektory Irına Grışenko.
Chempıondyq ataq úshin saıys óte tartysty ótti.Jeńimpazdardy taı-breık arqyly anyqtaýǵa týra keldi. Ásirese, 8 jasqa deıingi qyzdar arasyndaǵy oıyn tórt saǵatqa sozyldy. Osy rette, aqtóbelik Alan Petýhovtyń oıynyn erekshe atap ótýge bolady. Ol qurdastary arasynda blıts-týrnır jáne rapıd tásili boıynsha el chempıony atandy.
Shara Qazaqstan Shahmat federatsııasy, «Hod Konem» shahmat mektebi jáne bas demeýshiler «ABDI Kompanı» AQ men akademık Shahmardan Esenov atyndaǵy Ǵylymı-bilim berý qorynyń uıymdastyrýymen ótti.
Týrnır qorytyndysyna saı, klassıkalyq ádis boıynsha 8 jasqa deıingiler arasynda - aqtóbelik Alan Petýhov pen almatylyq Elnaz Qalıahmet, 10 jasqa deıingiler arasynda - almatylyq Eldana Qalıahmet pen astanalyq Álıhan Ǵalymbek, 12 jasqa deıingiler arasynda - qyzylordalyq Sultan Amanjol men astanalyq Merýert Kámálıdenova, 14 jasqa deıingiler arasynda -astanalyq Ásel Lesbekova men ońtústik qazaqstandyq Ábilmansur Ábdiqaıyr, 16 jasqa deıingiler arasynda - qostanaılyq Tımýr Nurjanov pen qyzylordalyq Ásel Serikbaı jáne 18 jasqa deıingiler arasynda almatylyq Arnash Baýyrjan jáne astanalyq Jandos Aǵymanov jeńimpaz atandy.
