Shahmatta da taktıka, shabýyl jáne qorǵanys bar - Bıbisara Asaýbaeva áskerı kolledjde

ASTANA. QazAqparat – Bıbisara Asaýbaeva áskerı kolledj tárbıelenýshileri úshin sheberlik sabaǵyn ótkizdi, dep habarlaıdy QazAqparat Qorǵanys mınıstrliginiń baspasóz qyzmetine silteme jasap.

Bıbisara Asaýbaeva Ulttyq qorǵanys ýnıversıtetinde armııa generaly Saǵadat Nurmaǵambetov atyndaǵy áskerı kolledj tárbıelenýshilerimen kezdesip, olarǵa arnaıy sheberlik sabaǵyn ótkizdi. Grossmeıster sporttyń erekshelikteri jáne onyń adam minezine áseri týraly aıtty.

«Shahmat mıdy jattyqtyrady, zeıindi barynsha bir jerge shoǵyrlandyrýǵa kómektesedi, shyǵarmashylyqty damytyp, problemalardy sheshýge úıretedi. Shahmat ta áskerı is sııaqty, onda taktıka da, shabýyl da jáne qorǵanys ta bar», - dedi ol.

Kezdesý sońynda Bıbisara Asaýbaeva shahmatty jańa úırenip júrgendermen jyldam partııa ótkizdi.

Foto: Qorǵanys mınıstrliginiń baspasóz qyzmeti