Shahmatshy Magnýs Karlsen amerıkalyq grossmeısterdi qýlyq jasady dep aıyptady

ASTANA. QazAqparat – Shahmattan álem chempıony Magnýs Karlsen alǵash ret qarsylastarynyń biri, amerıkalyq Hans Nımandy aldady dep ashyq aıyptady. Bul týraly QazAqparat VVS aqparat agenttigine silteme jasap habarlaıdy.

Karlsen sońǵy kezde Nımandy aıyptap, biraq sózine eshqandaı dálel keltirmedi.

Karlsen budan úsh apta buryn Sent-Lýıste 19 jastaǵy Nımannan kútpegen jerden jeńilip qalǵan soń jasyryn aıyptaýlar aıtqan bolatyn.

Nımannyń ózi bolsa adal oınaǵanyna sendirip, óz kezeginde Karlsendi mansabyn joıýǵa tyrysty dep kinálap otyr.

Amerıkalyq sportshy Chess24 arnasyna bergen suhbatynda reıtıngin kóterý jáne myqty oıynshylarmen oınaý úshin 16 jasynda Chess.com onlaın platformasyndaǵy kezdeısoq partııalarda keıde oıynda qýlyqqa barǵanyn moıyndady.

Bul rette shahmatshy naǵyz oıynda mundaıdy eshqashan jasamaǵanyn basa aıtty.

Janjal qyrkúıektiń birinshi jartysynda, Nıman Sent-Lýıstegi týrnırde (Sınkvfıld kýbogy) Karlsenge qarsy oıynda jeńip, norvegııalyqtyń 53 oıynnan turatyn jeńilissiz serııasyn buzǵannan keıin bastalǵan.

Eń uly shahmatshy dep sanalǵan Karlsen jeńiliske ushyraǵannan keıin týrnırdiń aıaqtalýyna áli alty raýnd qalsa da, oıynnan shyǵyp ketti.

Osydan keıin ol Twitter-de fýtbol jattyqtyrýshysy Joze Moýrınonyń «Eger men sóılesem, úlken qıyndyqqa tap bolamyn» degen beıneklıpin jarııalady.

Ótken aptada qarsylastar taǵy da kezdesti, bul joly týrnır onlaın ótken. Karlsen birinshi qadamnan keıin oıynnan bas tartty.

Keıinirek túsindirgendeı, bul áreketi Nımannyń aldaýyna jáne onyń týrnırge qatysýyna narazylyǵy bolǵan.

Karlsen týrnırde jeńiske jetip, keıin janjal týraly ashyq aıtýǵa ýáde berip, «shahmattaǵy aldaýdy qatań qarastyrýdy» qalaıtynyn aıtty.

Foto: www.bbc.com