Shahmatshy qyzdarymyz qoryqpasa, bárin jeńe alady - Qazaqstan quramasynyń jetekshisi P.Kotsýr
ASTANA. 12 naýryz. QazAqparat - Bizdiń shahmatshy qyzdarymyz qoryqpasa, alynbaıtyn qamal joq. Búgin chempıonattyń aıaqtalýyna oraı ótken baspasóz máslıhatynda Qazaqstan quramasynyń jetekshisi Pavel Kotsýr osylaı aıtty.
«Bizdiń shahmatshy qyzdarymyz áli jas. Álem chempıonatyn óz jerimizde ótkizýdiń arqasynda biz búgingi jetistikke jetip otyrmyz. Bul úlken jumystyń basy bolady. Menińshe, bizdiń qyzdarymyz qorqady. Olar qarsylastarynan qoryqpasa, bárin jeńe alady dep bilemin», - deıdi P.Kotsýr.
Aıta keteıik, on kúnge sozylǵan shahmat dodasynyń qorytyndysy boıynsha Qazaqstan 10 komandanyń ishinen 7-shi orynǵa ıe boldy. Birinshi orynda - Ýkraına, ekinshi jáne úshinshi oryndaryn Qytaı men Reseı komandalary enshiledi. «Negizi, biz besinshi orynǵa ıe bolamyz dep oılaǵanmyn. Alaıda jetinshi orynnyń ózi - jetistik.», - dep atap kórsetti Qazaqstan quramasynyń jetekshisi.
