Shahmatshy Bıbisara Asaýbaeva týǵan eline qalaı qaıta oraldy
ALMATY. QazAqparat - Qazaqstandyq jas shahmatshy, Halyqaralyq shahmat federatsııasynyń sheberi Bıbisara Asaýbaeva Qazaqstanǵa qaıta oraldy. Bıbisaranyń elge oralý sebebi týraly anasy Lıana Tańjaryqova Feısbýktegi paraqshasynda jazdy.
«Bıbisara shahmattan Qazaqstanda jetistikke jete almaı júrdi. Onyń birneshe sebepteri bolatyn. Men onyń ákesimen ajyrasyp ketkenmin. Alǵash altyn medaldan soń Bıbisaranyń aǵasy bizdi únemi aıaqtan shala bastady. Oǵan qarsylasa almadyq, óıtkeni sol kezde aǵasy bedeldi sheneýnik bolatyn. Sonyń kesirinen bizdi is-sharalarǵa shaqyrmaıtyn boldy. Shahmatqa qatysty kóptegen sharalar Bıbisarasyz ótip jatty», - dep jazady Lıana Tańjaryqova.
Osyndaı jaǵdaıdan soń anasy qyzyn alyp, Reseıge ketýge sheshim qabyldaǵan. Olardy Máskeý oblystyq shahmat federatsııasynyń prezıdenti Sergeı Nesterov shaqyrǵan.
«Bıbisara Reseı qorjynyna alǵashqy altyn medaldi salǵan soń, Qazaqstandaǵy «aǵamyz» kedergi keltire almaıtyn boldy. Men ońtaıly sátti paıdalanyp, Qazaqstan Prezıdenti Nursultan Nazarbaevqa hat jazdym. Bizdi qabyldap, qaıta oralýymyzǵa ruqsat berildi. Reseıde bizge páter berilgen. Ony jekeshelendirip alýǵa da bolar edi. Reseıdiń sport formasyn kıip, Sport mınıstrliginen qarjylandyrýǵa da qol jetkizýge bolar edi. Biraq onyń bárine tólqujat aýystyrǵan soń qol jetkizetin edik. Biz tólqujat aýystyrýdan bas tarttyq!», - deıdi shahmatshynyń anasy.
Onyń aıtýynsha, Bıbisaranyń kelýine Mańǵystaý oblysynan usynys túsken. AQSh-tan da shaqyrtý kelgen.
«2018 jyldyń qarashasynda AQSh-qa Garrı Kasparovtyń sessııasyna shaqyrdy. Ol jaqta sportshylarǵa jaqsy jaǵdaı jasalǵan. Olarda Amerıkanyń kez-kelgen JOO-sy grant beredi, júrip-turýy tegin bolady. AQSh-ta óz tólqujatyńdy aýystyrmasań da bolady. Olarda ondaı talap joq», - dedi Lıana Tańjaryqova.
Osynyń bárin oılana kele sportshynyń anasy ári menedjeri Qazaqstanǵa kelý týraly sheshim qabyldaǵan.
«Sizder patrıot bolyp ketti dep oılaısyzdar ma? Iá, dál solaı. Patrıotpyz! Biz óz elimizden basqa eshkimge kerek emespiz! Men ómirden sabaq alyp kele jatyrmyn! Men Elbasy Nursultan Ábishulyna alǵys aıtamyn! Ol sportshy balalardy nazarynan tys qaldyrǵan emes. 2019 jyldyń Jastar jyly dep jarııalanýy - Prezıdenttiń kóregendigin bildiredi. Bıbisara endi óz eliniń laıyqty azamaty bolýy úshin baryn salady», - deıdi anasy.
Sonymen qatar, Lıana Tańjaryqova QR Prezıdenti ákimshiliginiń jetekshisi Áset Isekeshovke, belgili bıznesmen Qaırat Boranbaevqa, Ǵalymjan Esenovke, Arystanbek Muhamedıulyna alǵysyn bildirdi.
«Barlyǵyna qıyn sátte demeý bolǵany úshin alǵys aıtamyn. Bıbisaraǵa bapkerge qarsy turý ońaı bolǵan joq. Men tek sottyń bitkenin kúttim. Men jeńiske jetetinimizge senimdi boldym. Bapkerdiń bizge taqqan aıyptary jalǵan bolatyn. Sot ádil sheshim shyǵardy. Advokattarymyz Aleksandr Dobrovınskııge, Marına Dýbrovskaıaǵa, Irına Býlkatovaǵa alǵys aıtamyn! Olar - naǵyz óz isiniń mamandary! Endi Bıbisara Asaýbaeva óz Otanynyń namysyn bar yntasymen qorǵaıtyn bolady», - dedi ol.
Aıta ketý kerek, 2017 jyldyń kúzinde Reseı Shahmat quramasynyń bapkeri Evgenıı Solojenkın Bıbisara Asaýbaevany alaıaqtyq jasady dep aıyptady. Onyń aıtýynsha, Bıbisara Ýrýgvaıdaǵy álem chempıonaty kezinde elektrondy nusqaý berýshini paıdalanǵan degen ýáj keltirdi.
Ol kezde Bıbisara 14 jasqa deıingi qyzdar arasynda oınaıtyn.
Keıinirek Máskeý apellıatsııalyq soty Asaýbaevanyń óz ar-uıatyn qorǵaý týraly aryzyn qanaǵattandyrdy.
Jas sportshy jaqynda Qazaqstan quramasyna endi. Ol endi Astanada 4-15 naýryz aralyǵynda ótetin álem chempıonatynda baq synaıdy.
