Shahmatshy Qazybek Nógerbek: Bul – búkil Qazaqstannyń jeńisi
ALMATY. KAZINFORM – Jasóspirimder arasynda shahmattan Azııa birinshiligi ótip jatqan Balýan Sholaq atyndaǵy sport saraıynda álem chempıony Qazybek Nógerbektiń qatysýymen baspasóz máslıhaty boldy.
Kazinform budan buryn málim etkenindeı, Úndistannyń Gandınagar qalasynda (Gýdjarat shtaty) shahmattan 20 jasqa deıingiler arasynda álem birinshiliginde qazaqstandyq Qazybek Nógerbek úzdik shyqqan edi. Atalǵan jarysqa 13 grossmeıster, 27 halyqaralyq sheberdi qosqanda, 123 shahmatshy qatysyp, baq synady.
El qúramasynyń múshesi, KazChess/Qazaqstan shahmat federatsııasynyń granttyq qoldaýynyń ıesi Q.Nógerbek (2502) 11 týrda 8,5 upaı jınap, chempıon atanyp qana qoımaı, álem kýbogine joldama aldy. Álem kýbogi álem chempıony ataǵyna úmitkerler irikteletin týrnırdiń bir bóligi bolyp esepteledi.
Baspasóz máslıhatyn ashqan KazChess birinshi vıtse-prezıdenti Dármen Sádýaqasov Qazybek Nógerbektiń jeńisin qyzdar ǵana emes, Qazaqstan erler quramasy músheleriniń joǵary tabysyn pash etetin «Qazaqstanda shahmatty damytý tarıhynyń jańa paraǵy» dep baǵalady.
«Biz búgin KazChess tarapynan qoldaýdyń bir jemisin kórip otyrmyz. Osy jeńisti eskere otyryp, Qazybekke kórsetiletin qoldaý aıasy budan da keńeıe túsetin bolady», - dedi D.Sádýaqasov.
KazChess atqarýshy dırektory Gúlmıra Dáýletova Qazybek Nógerbekti qazaqtyń uly bıimen salystyryp, ony HHІ ǵasyr chempıony dep atady. Qazybekti 10 jyldan astam ýaqyt boıy baptap kele jatqan Qazaqstannyń eńbek sińirgen jattyqtyrýshysy Erjan Shákenov shákirtiniń shahmatshy retinde óz sheberligin únemi jetildirip kele jatqanyn atap ótti.
«Qasym-Jomart Kemelulynyń quttyqtaýyn kórgennen keıin qatty qýandym. Qazir men azdap tolqyp otyrmyn. Bul – óte úlken nátıje, áli sene alar emespin. Bul – búkil Qazaqstannyń jeńisi. Bárińizge myń alǵys», - dedi Qazybek.
Ol álem kýboginde sátti óner kórsetip, reıtıngtik upaıyn 2 600-den asyrýǵa tyrysatynyn jetkizdi.
«Álem chempıon ataǵynan úmitkerler jarysynda baq synap, qazaqstandyqtar arasynda birinshi bolyp 2 700 upaı jınaǵym keledi», - dedi Q.Nógerbek.
