Shahmat: Jigitter – 40-orynda, qyzdar – alǵashqy ondyqta
NUR-SULTAN. QazAqparat – Qazaqstan álemdik shahmat arenasynda neshinshi orynda tur? Bul suraqqa ortalyq kommýnıkatsııalar qyzmetinde ótken brıfıng kezinde Qazaqstan shahmat federatsııasynyń atqarýshy dırektory Ánýar Esmaǵambetov jaýap berdi, dep habarlaıdy QazAqparat tilshisi.
«Erler men áıelder arasynda kórsetkishter boıynsha aıyrmashylyq bar. Erler quramasy 40-shy orynda bolsa, áıelder quramasy – úzdik ondyqta. Ókinishke qaraı, balalar arasynda mundaı kórsetkish joq. Biraq men elimizde shahmatshylardyń jaqsy býyny ósip kele jatqanyn aıta alamyn. Bizdiń shahmatshy balalar álem chempıonattarynan medalsyz oralyp kórgen joq», - dedi Ánýar Esmaǵambetov.
Sondaı-aq, ol Qazaqstannyń shahmat federatsııasy el qorjynyna eń kóp medal salatyn jetekshi federatsııalardyń biri ekenin jetkizdi.
«Mysaly, 2019 jyly shahmattan resmı álem chempıonattary men balalar arasyndaǵy tikeleı týrnırlerge shekteý bolmaı turǵan kezde Qazaqstan quramasy medaldar sany boıynsha úshinshi orynǵa ıe bolǵan edi. Qazaqstanmen bári sanasady. Oqý-jattyǵý jıyndaryn ótkizip, shahmatshylardy shákirtaqymen yntalandyryp otyrý úshin, jaqsy mamandardy shaqyrtyp, oıynshylardyń deńgeıin kóterý úshin qoldaý men qarajat kerek ekenin qaıtalap aıtqym keledi», - dedi federatsııa basshysy.
Buǵan deıin habarlaǵanymyzdaı, Memleket basshysy Qasym-Jomart Toqaev Jansaıa Ábdimálikti FIDE Gran-prıindegi jeńisimen quttyqtaǵan bolatyn.
Eske salsaq, atalmysh týrnırdegi jetistigi úshin otandasymyz erler arasyndaǵy halyqaralyq grossmeıster atanǵan edi.
