Shahmat olımpıadasynda qazaqstandyqtar tórtinshi márte jeńiske jetti
NUR-SULTAN. QazAqparat - Úndistannyń Chennaı qalasynda ótip jatqan Shahmat Olımpıadasynda elimizdiń erler jáne áıelder quramasy besinshi oıynyn ótkizdi. Bul joly qazaqstandyq shahmatshylar jeńiske jetti, dep habarlaıdy QazAqparat tilshisi.
Erler quramasy Latvııany 4:0 esebimen súrindirdi. Elimizdiń atynan synǵa túsken Rınat Jumabaev, Álisher Súleımenov, Arystanbek Orazaev jáne Qazybek Nógerbektiń barlyǵy jeńiske jetti.
Olar buǵan deıin Lıvandy 4:0, Qytaı Taıbeıin 3:1, Marokkony 2,5:1,5 esebimen jeńip, Tájikstanǵa 1,5:2,5 esebimen ese jiberip qoıdy.
Elimizdiń qyzdar quramasy besinshi kezdesýinde Kýbadan 3:1 esebimen basym tústi. Qurama sapynda Jansaıa Ábdimálik, Bıbisara Asaýbaeva, Ksenııa Balabaeva jáne Gúlishan Nahbaeva oıyn kórsetti.
Olar buǵan deıin Perý men Belgııany 3:1, Gvatemalany 4:0 jeńip, Mońǵolııamen 2:2 esebimen teń tústi.
