Shahmat Olımpıadasynda elimizdiń áıelder quramasy taǵy jeńiske jetti
NUR-SULTAN. QazAqparat - Úndistannyń Chennaı qalasynda ótip jatqan shahmat Olımpıadasynda elimizdiń áıelder quramasy altynshy jeńisine qol jetkizdi, dep habarlaıdy QazAqparat tilshisi.
Elimizdiń áıelder quramasy Slovakııadan 3,5:0,5 esebimen basym tústi. Qazaqstandyq shahmatshylar qatarynan Jansaıa Ábdimálik, Bıbisara Asaýbaeva jáne Gúlishan Nahbaeva jeńiske jetse, Ksenııa Balabaeva qarsylasymen teń tústi.
Bul - qazaqstandyqtardyń altynshy jeńisi. Olar buǵan deıin Perý, Kýba men Belgııany 3:1, Vetnamdy 2,5:1,5, Gvatemalany 4:0 esebimen jeńip, Mońǵolııamen 2:2 esebimen teń tústi. Al Ázerbaıjanǵa 1:3 esebimen jol berip qoıdy.
Al elimizdiń erler quramasy búgin Ázerbaıjanǵa 1,5:2,5 esebimen jol berip qoıdy.
Erler quramasy buǵan deıin Lıvan men Latvııany 4:0, Qytaı Taıbeıin 3:1, Marokko, Chehııa, Ispanııany 2,5:1,5 esebimen jeńip, Tájikstanǵa 1,5:2,5 esebimen ese jibergen-di.
Olardyń qatarynan Álisher Súleımenov, Rınat Jumabaev teń tússe, Arystanbek Orazaev pen Qazybek Nógerbek qarsylastaryna ese jiberip qoıdy.
Erler quramasynyń enshisinde 6 jeńis, 2 jeńilis bar.
Eske salaıyq, buǵan deıin Bıbisara Asaýbaeva Azııanyń úzdik shahmatshysy atanǵanyn, ony bul jetistigimen QR Prezıdenti Qasym-Jomart Toqaev quttyqtaǵanyn jazdyq.
