Shahmat Olımpıadasy: Qazaqstandyq oıynshylar 6-týrda qandaı nátıje kórsetti

ASTANA. KAZINFORM – Majarstan astanasy Býdapeshtte ótip jatqan 45-shi shahmat Olımpıadasynda (45th FIDE Chess Olympiad) elimizdiń erler jáne áıelder quramasy kezekti oıynyn ótkizdi.

Sportty damytý dırektsııasynyń baspasóz qyzmeti atap ótkendeı, Qazaqstan erler quramasy (2513, №41) Ońtústik Afrıka Respýblıkasyn (2302, №79) 3½–½ esebimen senimdi túrde jeńdi. Jigitterimizdiń arasynan Mahnev, Nógerbek, Súleımenov qarsylastarynan aılasyn asyrsa, Ańsat teń esepti qanaǵat tutty.

Endi erlerimiz Ázerbaıjanmen (2657, №12) baq synasady.

Áıelder quramasy bolsa (2373, №10), reıtıng jaǵynan tómen Kýbaǵa (2215, №29) esh múmkindik qaldyrmady. Esep: 4:0. Merýert Kamalıdenova, Ksenııa Balabaeva, Alýa Nurman men Amına Qaıyrbekova da qatelikke jol bermedi.

Arýlarymyz endi TOP-10-daǵy Ázerbaıjanmen (2398, №6) ózara myqtyny anyqtaıdy.

Barlyǵy 183 eldiń qatysýymen ótip jatqan shahmat Olımpıadasynda áıelder quramasy 10 upaımen 6-orynda tursa, erlerimiz 8 upaımen 35-orynda keledi.

Aıta keteıik, besinshi týrda jerlesterimiz Úndistan men Rýmynııa komandalarymen sheberlik baıqasty.

Altynǵa úmitti Úndistanǵa qarsy oıynda blıts túrleri boıynsha 2 dúrkin Álem chempıony Bıbisara Asaýbaeva ǵana jeńiske jeńiske jetip, Ksenııa Balabaeva teń tústi. Ókinishke qaraı Merýert Kamalıdenova men Alýa Nurman qarsylastaryna ese jiberdi.

Al erler básekesinde Denısa Mahnev, Ramazan Jalmahanov jáne 20 jasqa deıingiler arasynda álem chempıony Qazybek Nógerbek qarsylastarymen teń tarqassa, Aldııar Ańsat jeńilistiń aşy dámin tartty.