Shahmat olımpıadasy: Qazaqstan quramasy kósh bastap keledi

ASTANA. KAZINFORM – Majarstan astanasy Býdapesht qalasynda ótip jatqan shahmattan 45-shi Olımpıada oıyndarynda Qazaqstan quramasy 9-shy týrdan keıin kósh basyna kóterildi.

Toǵyzynshy týrda Qazaqstan quramasy basty favorıttiń biri Polshamen synǵa túsip, nátıjesinde qarsylastaryn 2,5:1,5 esebimen qapy qaldyrdy. Jeńisti komandamyzǵa Alýa Nurman syılady. Al Bıbisara Asaýbaeva, Merýert Qamalıdenova jáne Ksenııa Balabaeva óz oıyndaryn teń nátıjemen aıaqtady.

Nátıjesinde, toǵyz týrdan keıin Qazaqstan quramasy 16 upaımen birinshi orynǵa shyqty. Odan keıingi oryndarda Úndistan (15), Polsha jáne AQSh (árqaısysy 14 upaıdan) ornalasqan.

Olımpıada sońyna deıin áli eki týr qaldy.

Esterińizge sala keteıik, 8-týrda otandastarymyz týrnır kestesinde ózderimen shamalas turǵan Frantsııadan (2355, №13) 2,5-1,5 esebimen myqtylyǵyn kórsetken bolatyn.

Onda Bıbisara Asaýbaeva men Alýa Nurman qarsylasynan basym tússe, Ámına Qaıyrbekova teń oınady. Tek Merýert Kamalıdenova jeńilissiz kele jatqan Mıllıet Sofıege shamasy jetpedi.