Shahmat hanshaıymy Jansaıa Ábdimálik «Barystyń» qataryna qosyldy
ASTANA. 20 jeltoqsan. QazAqparat - 19 jeltoqsanda Astanada úshinshi ret «Halyq súıiktisi -2013» premııasymen marapattaý saltanaty bolyp ótti.
Kóptegen atalymdar qatarynda saıasatker, estrada juldyzy, sheneýnik, jýrnalıst, bloger, bıznesmen, qoǵam qaıratkeri, saıasattanýshy jáne sportshylardyń úzdikteri tańdaldy. Barlyǵy 14 atalym boıynsha 367 úmitker baq synady.
Úzdik sportshy, dálirek aıtsaq, «Respekt-sportshy» atalymynda Qazaqstandyq jas shahmatshy Jansaıa Ábdimálik jeńimpaz atandy. Dıplom men dástúrli «halyq súıiktisi» músinshesin oǵan «Barys» hokkeı klýbynyń jattyqtyrýshysy, 6 olımpıadaǵa qatysqan ǵalamshardaǵy jalǵyz sportshy Raımo Helmınen jáne Sporttyq baspasóz qaýymdastyǵynyń prezıdenti Іlııas Omarov tapsyrdy.
Oǵan qosa, Raımo Helmınen qosymsha syılyq retinde shahmatshynyń súıikti 12-shi nómiri jáne onyń tegi jazylǵan «Barystyń» sporttyq jeıdesin tapsyryp, saltanatty rásimge qatysýshylardy tań qaldyrdy.
Daýys berý bir aı boıy eki kezeńde ótkeni belgili. Birinshi kezeń Facebook áleýmettik jelisinde ótti. Ekinshi kezeń «Halyq súıiktisi -2013» Ulttyq Premııanyń resmı saıtynda ótkizilip, onda birinshi kezeńde kóbirek daýys jınaǵan tórt fınalıst ózara saıysqa tústi.
