Shahmat federatsııasynyń vıtse-prezıdenti Bıbisara Asaýbaevanyń málimdemesine jaýap berdi
«Daý kútpegen jerden shyqty. Buǵan deıin men ol málimdemeniń shyndyqqa janaspaıtynyn aıtqan bolatynmyn. Eń bastysy, biz Bıbisarany, onyń zor talanty men áleýetin joǵary baǵalaımyz. Janjal neden týdy? «Qyzdardy prezıdentke aqsha suraý úshin aparǵan» degen málimdeme taraǵan. Biraq biz sizderge damý tujyrymdamasyn kórsettik, bul - Memleket basshysyna usynǵan qujat. Onda aqsha týraly eshteńe joq, eshqandaı soma aıtylmaǵan. Biz shahmatty damytýdyń tujyrymdamasy men tásilderi týraly aıttyq», - dedi Dármen Sádýaqasov jýrnalıstermen kezdesýde.
Onyń aıtýynsha, shahmat federatsııasy katalızator, ol memlekettik bıýdjetti basqarmaıdy.
«Eger qarjy bólinetin bolsa, ol mınıstrlik, ákimdik arqyly shahmat sektsııalary men úıirmeler ashýǵa, sportshylardy qarjylandyrýǵa jumsalady. Federatsııa shahmatty buqaralyq sport, joǵary jetistikter sporty turǵysynan qalaı damytý kerektigi týraly kásibı pikir bildiredi», - dedi spıker.
Sonymen qatar, ol Bıbisaranyń nelikten mundaı málimdeme jasaǵanyna da jaýap berdi.
«Biz Bıbisaranyń anasy tarapynan qyzǵanysh bolýy múmkin dep oılaımyz. Bul jazbany Bıbisaranyń ózi emes, anasy jazǵan bolýy múmkin. Bul - bizdiń ustanymymyz. Múmkin olaı emes shyǵar», - dedi federatsııa vıtse-prezıdenti.
Sonymen qatar, Dármen Sádýaqasov federatsııada sportshylardy qarjylandyrýda teńgerimsizdik bar ekenin aıtty. Onyń pikirinshe, bul durys emes.
Buǵan deıin Bıbisara Asaýbaeva óziniń Instagram paraqshasynda shahmat federatsııasy tanymal sportshylardy Prezıdent ákimshiliginen úsh mıllıard teńge suratý úshin paıdalandy dep jazǵan bolatyn.
