Shahmat chempıonaty: ıAn Nepomnıaşıı men Dın Lıjen alǵashqy oıynda teń tústi

ASTANA. QazAqparat – ıAn Nepomnıaşıı men Dın Lıjen álem chempıony ataǵy úshin matchtyń birinshi partııasynda teń tústi, dep habarlaıdy QazAqparat Qazaqstan shahmat federatsııasyna silteme jasap.

Álem birinshiligi matchynda ıAn Nepomnıaşıı men Dın Lıjen arasyndaǵy birinshi partııany shahmatsúıer qaýym asyǵa kútken edi.

Altynshy júriste ıAn Nepomnıaşıı (aq fıgýralar) asa sırek kezdesetin varıantty tańdady, bul osy kúnge deıin onyń partııalarynda, tipti álem matchtaryndaǵy shahmat oıyndarynda da kezdespegen.

ıAnnyń alǵashqy tosyn júrisi qytaı grossmeısterine ońaı tıgen joq. Dın birinshi júristi jasaý úshin uzaq oılanyp otyrdy.

«Debıýttik aqpen júrý óz jemisin berdi, Dın Lıjen 1-2 dálsizdikke jol berdi, onyń pozıtsııasy tómendedi. Degenmen, 29-shy júriste daǵdarys bastaldy. Qos grossmeıster jaǵdaıdy óte jyldam baǵalap, qytaı chempıony ári qaraı senimdi oınaı bastady. Pozıtsııa edáýir jeńildep, ferzderdi aıyrbastaǵannan keıin shahmat taqtasynda túrli-tústi pilder paıda bolǵanda oıynnyń teń aıaqtalatyny túsinikti boldy. 49-shy júriste qarsylastar qol alysyp, teń oıynǵa kelisti», - dep habarlady federatsııa.

Eske sala keteıik, Astanada 7 sáýir men 1 mamyr aralyǵynda shahmattan álem chempıonaty ótip jatyr.

Onda ıAn Nepomnıaşıı (FIDE) men qytaılyq Dın Lıjen álem chempıony ataǵyna talasady. Keshe tanymal sportshylar baspasóz máslıhatyn ótkizip, tilshilerdi qyzyqtyrǵan suraqtarǵa jaýap bergen edi.

Sondaı-aq Qazaqstan shahmat federatsııasynyń prezıdenti Tımýr Týrlov shahmattan álem chempıonaty nelikten Astanada ótip jatqanyn túsindirdi.

Chempıonatta Qazaqstannyń shahmatshy qyzdary álem quramasyna qarsy oınaıdy.