Shahıd-Radjaı portyndaǵy jarylystan 1139 adam zardap shekken

ASTANA. KAZINFORM — Iranda Shahıd-Radjaı portyndaǵy jarylys saldarynan zardap shekkender sany artyp, 1139 adamǵa jetti, dep habarlaıdy TASS.

Bul týraly Iran Úkimetiniń ókili Fateme Mohadjeranı málim etti.

Onyń sózinshe, qazir porttaǵy jaǵdaıǵa baqylaýǵa alyndy. Sońǵy málimetterge sáıkes Irannyń medıtsınalyq mekemelerinde 1139 adam emdelip jatyr.

— Olardyń keıbireýi Shıraz ben Lýrestanǵa áýe kóligi arqyly jetkizildi, — dep jazdy ol X áleýmettik paraqshasynda.

Eske salsaq, kúndiz Bender-Abbas portynda joıqyn jarylys boldy. Onyń sebebi ázirge belgisiz. Bastapqyda 47 adam jaralanǵany jáne 8 adam qaza tapqany habarlanǵan, biraq keıin zardap shekkender sany 750-ge jetti. Sonymen qosa 14 adam opat boldy. 

Oqıǵa ornynan túsirilgen kadrlardan porttyń bir bóliginiń qatty zaqymdanǵanyn kórýge bolady.

Qaıǵyly oqıǵaǵa baılanysty Memleket basshysy Iran Prezıdentine kóńil aıtý jedelhatyn joldady.

Sonymen qatar Irannyń jarylys bolǵan portynyń Qazaqstan úshin mańyzy qandaı ekeni naqtylandy.

Budan bólek, Irandaǵy jarylysqa zymyran otynynyń komponenti sebep bolýy múmkin ekeni aıtyldy.