Islamabadtaǵy kezdesý: Qazaqstan men Pákistan yntymaqtastyqty tereńdetýge nıetti
ISLAMABAD. KAZINFORM — Shahbaz Sharıf Qazaqstan Prezıdentin Islamabadta ystyq yqylaspen qarsy aldy, dep habarlaıdy Aqordanyń baspasóz qyzmeti.
— Elimizge arnaıy ýaqyt taýyp kelgenińiz úshin Sizge alǵys aıtamyz. Pákistan halqymen, Úkimetimen birge Sizdi qarsy alǵanyma qýanyshtymyn. Qazaqstan — bizdiń strategııalyq seriktesimiz. Dostyǵymyzdy nyǵaıtyp, ekonomıkanyń túrli baǵyttarynda, saıasat, qorǵanys salalarynda senimdi seriktestik ornatý, sondaı-aq saýda dálizderin qalyptastyrý maqsatynda Qazaqstan Úkimetimen tyǵyz qarym-qatynasta jumys istegimiz keledi. Buǵan kúmánińiz bolmasyn, — dedi Premer-mınıstr.
Shahbaz Sharıftiń aıtýynsha, Pákistan men Qazaqstannyń saýda-ekonomıkalyq yntymaqtastyqty, sonyń ishinde energetıka, ónerkásip, aýyl sharýashylyǵy, kólik, tsıfrlandyrý salalaryndaǵy seriktestikti damytýda áleýeti jetkilikti.
Premer-mınıstr ekijaqty qarym-qatynastyń barlyq baǵyty boıynsha naqty ári eleýli progress qajet ekenine nazar aýdardy. Kelissóz sońynda Qasym-Jomart Toqaev pen Shahbaz Sharıf eki el halyqtarynyń ıgiligi úshin san qyrly yntymaqtastyqty odan ári tereńdetýge múddeli ekenin rastady.
Budan buryn Qasym-Jomart Toqaev pen Shahbaz Sharıf shaǵyn quramda kelissóz júrgizgenin jazǵanbyz.