Shahandyq ot jaǵýshynyń máıiti en daladan tabyldy
QARAǴANDY. QazAqparat - Shahtınsk qalasy mańynda ornalasqan Shahan kenti janyndaǵy jazyq daladan kópqabatty úıdegi jylý qazandyǵynyń jarylýy boıynsha atyshýly istiń kýágeri bolǵan ot jaǵýshynyń máıiti tabyldy, dep habarlaıdy «QazAqparat» HAA tilshisi.
«Ot jaǵýshynyń múrdesinde eshqandaı zorlyq-zombylyq izi joq. Máıittiń tabylýy boıynsha tergeý júrip jatyr. Jesiri ony tanydy. Máıit saraptamaǵa jiberildi», - dep málimdedi Qaraǵandy ІІD baspasóz qyzmetiniń jetekshisi Baqytjan Qudııarov.
Ot jaǵýshynyń jylý qazandyǵynyń jarylýy jáne 9 adamnyń qaza tabýy týraly qylmystyq is boıynsha kýáger atanǵany belgili. Sol túni ot jaǵýshy aýysymda bolǵan jáne jylý júıesiniń toqtaýsyz jumys isteýin baqylaýy tıis edi.
Sotqa deıingi tergeý QR QK 281-baby, 2-bóligi («Jarylys qaýpi bar obektilerde qaýipsizdik qaǵıdalaryn buzý, abaısyzda adam ólimine nemese ózge de aýyr zardaptarǵa ákep soǵý») boıynsha júrgizilip jatyr. 1 sáýir kúni tergeý tórtinshi aıǵa uzartyldy. Qazirgi ýaqytta zardap shekkender men kýágerlerden jaýap alynýda, birqatar saraptamalar taǵaıyndaldy.
Esterińizge sala keteıik, bıyl 1 qańtarda keshki 22:40-ta Qaraǵandy oblysy Shahan eldi mekeninde bes qabatty úıdiń jertólesindegi jylý qazandyǵy jaryldy. Saldarynan tórtinshi kireberis qırady. 9 adam mert bolyp, eki adam - 32 jastaǵy Aleksandr Galyshev pen 11 jasar Elena Vasıleva jaralandy.
Buǵan deıin ákimdik, energetıka basqarmasy jáne TJ departamenti qyzmetkerleriniń Qaraǵandy oblysyndaǵy jeke qazandyǵy bar úılerge keshendi tekseris júrgizgeni habarlanǵan edi. Bul jumys bir aıǵa sozylyp, 31 qańtar kúni aıaqtaldy. Avtonomdy jylytý júıesi bar 688 nysan anyqtaldy, olar - turǵyn úıler men memlekettik mekemeler. Jylytý maýsymy aıaqtalǵan soń, azamattardyń qaýipsizdigi úshin barlyq qazandyqtar ǵımarattardan tys jerge shyǵarylady.
