Shahandaǵy opyrylǵan turǵyn úıdiń astynan 9 adamnyń máıiti shyǵaryldy
ASTANA. QazAqparat - Shahtınsk qalasyna qarasty Shahan kentinde opyrylǵan kóp qabatty turǵyn úıdiń úıindileri arshylyp jatyr. Qazir úıindi astynan kóz jumǵan 9 adamnyń denesi shyǵaryldy, dep habarlaıdy QR ІІM TJK-nyń resmı ókili Rýslan Imanqulov.
«Qazirgi ýaqytta úıindi astynan 9 kóz jumǵan adamnyń denesi arshyp alyndy. Onyń úsheýi er adam, úsheýi áıel, úsheýi bala. Balanyń bireýi 2016 jylǵy, ekinshisi 2010 jylǵy»,- dep málim etti Imanqulov.
Úıindilerdi tazartýǵa 280 adam jumyldyrylǵan , olardyń qatarynda qutqarýshylar, polıtsııa qyzmetkerleri, jergilikti atqarýshy organdar, jedel medıtsınalyq járdem brıgadasy, Ulttyq ulannyń 52859 áskerı bóliminiń aýyr tehnıkasy jáne jeke kásipkerler bar.Buǵan deıin habarlanǵandaı Qaraǵandy oblysy Shahtınsk qalasyna qarasty Shahan kentindegi turǵyn úıdiń qulaý oqıǵasyna qatysty Shahan kenti ákimdigi qasynan shuǵyl jeli ashyldy: 8 (72156) 3-24-17.
Eske sala keteıik, 1 qańtar kúni 22:40-ta Qaraǵandy oblysy TJD qutqarý bólimine Shahtınsk qalasy Shahan aýylyndaǵy kópqabatty úıdiń bir bóligi opyrylyp túskeni týraly qońyraý shalynǵan . Oqıǵa ornyna shuǵyl túrde TJD qutqarýshylary jóneltilip, turǵyndar evakýatsııalandy . Áýeli 1 adamnyń máıiti úıindi astynan shyǵarylǵan bolatyn. Keıin ekinshi turǵynnyń denesi úıindi astynan tabyldy.
