Shahandaǵy oqıǵadan zardap shekken 11 jasar qyzǵa uzaq merzimdi saýyqtyrý qajet
QARAǴANDY. QazAqparat - Qaraǵandyda Maqajanov atyndaǵy klınıkadan Shahan kentinde oryn alǵan TJ-dan zardap shekken 11 jasar Lena Vasılevany shyǵardy, dep habarlaıdy «QazAqparat» HAA tilshisi.
Tústen keıin qyzdyń týystary úıine alyp ketti. Alaıda bir jarym aıdan keıin oǵan aýrýhanaǵa qaıta oralýǵa týra keledi.
«Qyzdyń jambas súıegi maıdalanǵan. Oǵan ota jasaldy, metallofıksator qoıyp, gıps saldy. Qazirgi tańda tynyshtyq qajet, tek baldaq júrýi tıis. Bir jarym aıdan keıin aýrýhanaǵa qaıta jatqyzyp, býyn qozǵalysyn damytý kerek, - dep aıtty balalar travmatologııasy men ortopedııasynyń ordınator-dárigeri Aleksandr Lı. - Ary qaraı býynnyń betiniń qalaı qalpyna kelip jatqanyn baqylaımyz. Saýyqtyrý kýrsy jarty jylǵa sozylýy múmkin. Tolyqtaı júrip ketýi úshin bir jyldaı ýaqyt kerek».
Sonymen qatar, búldirshin psıhologtyń kómegine muqtaj. Jarylys kezinde tómen qulaǵan qyz tiri qaldy. Úıindiniń astynda onyń ápkesi jas balasymen qaza tapty.
Lenaǵa bıylǵy oqý jylynda sabaqqa barmaıtyny týraly habar aıtyldy. Oǵan muǵalimder úı jaǵdaıynda sabaq oqytady.
Aýrýhanada qutqarýshylar úıindiniń astynan tapqan 32 jastaǵy Aleksandr Galyshev jatyr. Sal aýrýymen aýyratyn zardap shegýshi 10 saǵat boıy úıindiniń astynda jatyp, tiri qalǵan.
Esterińizge sala keteıik, 1 qańtar kúni 22 saǵat 40 mınýtta Qaraǵandy oblysynyń Shahan kentindegi turǵyn úıdiń bir bóligi qulady. Qıraǵan úıdiń astynda 9 adam mert boldy. Onyń úsheýi - balalar.
