Shahandaǵy qaıǵyly oqıǵaǵa qatysty 5 laýazymdy tulǵa qylmystyq jazaǵa tartylady
ASTANA. QazAqparat - Shahan kentindegi birneshe adamnyń qaza bolýyna sebep bolǵan qazandyqtyń jarylýyna qatysty qylmystyq istiń tergeý jumystary aıaqtaldy. Jaqyn arada bes laýazymdy tulǵa sot aldynda jaýap beretin bolady, dep habarlaıdy ákimdiktiń baspasóz qyzmeti.
Olar - kent ákimi Murat Jaqypov pen onyń eki qyzmetkeri jáne Shahtınsk ákimdiginiń eki qyzmetkeri. Olarǵa QR QK 370-baby 4 taraýy - «Aýyr zardaptarǵa ákep soqqan qyzmettegi áreketsizdik» boıynsha aıyp taǵylýda. Ol jaıynda Qaraǵandy oblysy prokýrorynyń tergeý jáne tergeý toptaryn basqarý boıynsha kómekshisi Ǵabıden Jıenbaev málimdedi.
«Qazirgi tańda Shahandaǵy jylytý qazandyǵynyń jarylýy faktisine qatysty qylmystyq istiń tergeýi aıaqtaldy, is sotqa berilý satysynda. Іstiń materıaldaryn protsessýaldy prokýror zerttep jatyr. Atalmysh is boıynsha qylmystyq jaýapqa 5 laýazymdy tulǵa tartylady: Shahan kentiniń ákimi Murat Jaqypov, onyń kommýnalyq máseleler boıynsha orynbasary Áketaı Nájmıden, kommýnaldyq máseleler boıynsha bas maman Marııa Jumabekova, sondaı-aq Shahtınsk qalasynyń turǵyn-úı kommýnaldyq sharýashylyq, jolaýshy tasymaldaý kóligi, avtomobıl joldary jáne turǵyn úı ınspektsııasy bólimi bastyǵynyń mindetin atqarýshy Almas Omarhanov pen Shahtınsk TKSh bóliminiń turǵyn úı sektorynyń bas mamany Nurjan Mahanbetov. Olarǵa «kepil» bultartpaý sharasy tańdaldy», - dedi Ǵabıden Jıenbaev.
Onyń málimdeýinshe, tergeý barysynda kúdiktiler olarǵa taǵylǵan kináni moıyndamaǵan.
«Іstiń materıaldary boıynsha olardyń qylmystyq zańbuzýshylyqqa qatysy bar ekeni dáleldendi. Jylytý qazandyǵyn paıdalanýda bolǵan ereje buzýshylyqqa, qurylym normalary men erejereliniń buzylýyna qaramastan laýazymdy tulǵalar uzaq ýaqyt boıy esh áreket etpegen. Ol olqylyqtardy joıý úshin eshqandaı jumystar jasalmaǵan», - deıdi arnaıy prokýror.
Onyń málimetinshe, bul is boıynsha qaza bolǵandardyń týystary men zardap shekken11 adam jábirlenýshiler dep tanylǵan. Memleketke zııan keltirilgen, sebebi apattyń saldaryn joıýǵa bıýdjetten qarajat jumsaldy. Atalmysh bap boıynsha aıyptalýshylarǵa 4-ten 8 jylǵa deıin bas bostandyǵynan aıyrylý qylmystyq jazasy bekitilýi múmkin.
«Amnıstııa bolmaıdy, sebebi olar zańnyń ol qoldanysyna túspeıdi», - dep túsindirdi Ǵabıden Jıenbaev.
Esterińizge sala keteıik, Shahanda 1-shi qańtarda qaıǵyly oqıǵa oryn alǵan bolatyn. Jertólede ornalasqan jylytý qazandyǵynyń jarylýy saldarynan bes qabatty úıdiń bir bóligi qulaǵan edi. Úıindiniń astynda 9 adam qaıtys boldy, onyń úsheýi bala. Eki zardap shegýshi aýrýhanaǵa jetkizildi. Sol túni kezekte bolǵan pesh jaǵýshy tótenshe jaǵdaıdan soń ǵaıyp boldy. Biraz ýaqyttan soń onyń qatyp qalǵan máıiti daladan tabylǵan.
2005 jyldan bastap Shahan eldi mekeniniń turǵyndary ortalyqtandyrylǵan qazandyq salýdy talap etip kelgen. 2013 jyly jobalyq-smetalyq qujattama quryldy, alaıda qarjylandyrý máselesi uzaqqa sozylyp ketken.
Oqıǵadan soń zardap shekkenderge kómek kórsetý maqsatynda jeke qaıyrymdylyq qory quryldy. Oǵan 200 mln teńgeden astam qarjy túsken. Bul qarajattan qaza bolǵandardyń týystary men zardap shekkenderge materıaldyq kómek jáne joǵalǵan múlik quny óteldi. Sonymen qatar qaıyrymdylyq qory úıdi qaıta qalpyna keltirý jumystary men modýldik qazandyqtyń qurylysyna aqsha bólýdi óz moınyna aldy. Demeýshilerden jınalǵan qarjyǵa baspanasyz qalǵan barlyq turǵyndarǵa úı satyp alyndy. Eki otbasy óz erki boıynsha páterlerdiń ornyna aqshalaı kómek aldy.
Shahtınsk ákimdigi TJ qorynan apattyq-qutqarý jumystaryna 1,4 mln. teńge jumsaldy.
