Shahandaǵy qaıǵyly oqıǵa: Ortalyq qazandyq qurylysyna qarjy áli bólinbegen
ASTANA. QazAqparat - Qaraǵandy oblysynyń Shahan kentindegi ortalyq qazandyq pen jylý júıesiniń qurylysyna 2 mlrd 232,0 mln teńge kerek. Juma, 31 qańtar kúni Senat otyrysynda Premer-Mınıstr Baqytjan Saǵyntaevtyń atyna depýtattyq saýal joldaǵan Rysqalı Ábdikerov qazandyqqa qarjy bólýdiń ózektiligin aıtty, dep habarlaıdy QazAqparat tilshisi.
«Qaraǵandy qalasynan 35 shaqyrym jerde ornalasqan, Shahtınsk qalalyq ákimshiligine qarasty 118 kópqabatty turǵyn úıi bar qala tıptes Shahan kentinde qazirgi tańda 9 myńnan asa halyq turady. Halyqtyń 80 paıyzdan astamyn shahterlar otbasy quraıdy. Toqyraý jyldary - 1995 jyly jylý beretin ortalyqtandyrylǵan jalǵyz qazandyqtan aıyrylyp qalǵan Shahan kenti qazirgi ýaqytta turǵyndardyń esebinen salynǵan shaǵyn qazandyqtardyń kómegimen nemese «býrjýıka» dep atalatyn peshterdi paıdalanyp, kópqabatty úılerdi jylytyp, amaldap otyr», - deıdi depýtat saýal hatynda.
Senator osyǵan baılanysty 2005 jyldan bastap Shahan eldimekeniniń turǵyndary ortalyqtandyrylǵan qazandyq salýdy talap etip, 2013 jyly jobalyq-smetalyq qujattama ázirlengenimen, qarjylandyrý máselesi sheshilmegenin alǵa tartady.
«Osy tusta 2017 jyldyń 1 qańtarynda qala halqyn dúr silkindirip, kópqabatty úılerdiń birindegi jertólede ornalasqan avtonomdy jylý qazandyǵy jarylǵanyn eske salamyn. Úıdiń bir bóligi opyrylyp qulap, 9 adam qaza tapty, 2 turǵyn jaraqat aldy. Budan ári mundaı qaıǵyly oqıǵany boldyrmaı, kent turǵyndaryn kepildi jáne arzan jylýmen qamtamasyz etý úshin ortalyqtandyrylǵan qazandyq salý qajettigi týyndap otyr. Osy mańyzdy máseleni sheshý úshin qazir Shahandaǵy ortalyq qazandyq pen jylý júıesiniń qurylysyna jobalyq-smetalyq qujattama qaıtadan ázirlenip, memlekettik saraptamadan ótti. Qurylys-montajdaý jumystarynyń somasy 2 mlrd 232,0 mln teńgeni quraıdy», - deıdi Rysqalı Ábdikerov.
Depýtat osyǵan oraı, jobany iske asyrý Shahan kentiniń turǵyndaryn ortalyq jylý júıesimen qamtamasyz etýge jáne qaýipsiz ómir súrýine múmkindik beretinin atap ótti.
«Sondaı-aq, qazandyq qurylysy kenttegi turǵyn úı qoryn saqtap, onyń damýyna yqpal etedi, adamdardyń ómir súrý deńgeıin jáne sanıtarlyq-ekologııalyq jaǵdaıyn jaqsartady. Osy aıtylǵan máseleniń erekshe mańyzdylyǵyn eskere otyryp, Shahan kentine salynatyn ortalyq qazandyq qurylysyna qajetti qarjy bóldirýge yqpal etýińizdi suraımyz», - deıdi senator.
Eske sala ketsek, 2017 jyldyń 1 qańtary kúni túnge jaqyn Qaraǵandy oblysy, Shahtınsk qalasynyń Shahan kentinde kópqabatty úıdiń bir bóligi opyrylyp qulady. Úıindilerdi tazartýǵa 280 adam jumyldyryldy, olardyń qatarynda qutqarýshylar, polıtsııa qyzmetkerleri, jergilikti atqarýshy organdar, jedel medıtsınalyq járdem brıgadasy, Ulttyq ulannyń 52859 áskerı bóliminiń aýyr tehnıkasy jáne jeke kásipkerler boldy. 9 adam mert boldy. Qaıǵyly oqıǵaǵa turǵyn úıdegi qazandyqtyń jarylýy sebep bolǵan.
Keıin Qaraǵandy oblysynyń ákimdigi Shahandaǵy ortalyq qazandyq qurylysy týraly jańartylǵan qujattar paketimen Ulttyq ekonomıka mınıstrligine júginip, respýblıkalyq bıýdjetten 2 mıllıard 800 mıllıon teńge suraǵan bolatyn.
«Ortalyq qazandyq qurylysynyń quny - 2 mıllıard 800 mıllıon teńge. 2014 jylǵy jobalyq-smetalyq qujattama dál osy somaǵa qurylǵan», - dep habarlaǵan edi Qaraǵandyda ótken brıfıngte Shahan qalasynyń ákimi Serjan Aımaqov.
Aımaqovtyń aıtýynsha, eldi mekenge ortalyqtan jylytatyn qazandyq kerek.
«Shahanda 107 úı kishkene peshpen jylynyp otyr. Ondaı peshter turǵyndar ómiri úshin asa qaýipti», - degen bolatyn ákim.
Resmı derekter boıynsha, Shahanda 14 avtonomdy jylytý júıesi bar, olar 14 kópqabatty úıdi jylytady jáne jertólede ornalasqan.
