Shahanda zardap shegýshilerdiń kómek qorynan 12 mln astam teńge tólendi

QARAǴANDY. QazAqparat - Qaraǵandyda Shahan kentindegi tótenshe jaǵdaıTJ saldarynan zardap shegýshilerge arnalǵan jeke qaıyrymdylyq qorynyń ókilderi óz jumystary týraly jýrnalısterge aıtyp berdi, dep habarlaıdy «QazAqparat» HAA tilshisi.

«17 qańtar kúngi derek boıynsha bizdiń qorǵa 79,4 mln. teńge qarjy tústi. Qazirgi tańǵa deıin 12 mln. 671 myń teńge jumsaldy, - dep habarlaıdy Qordyń qamqorshylyq keńesiniń tóraıymy Jamal Mamerhanova óńirlik kommýnıkatsııalar qyzmetindegi brıfıngte. Qor ókilderiniń aıtýynsha, zardap shegýshilerge arnap satyp alyp berýge páterler izdestirilý bastaldy.

«Barlyǵy 14 páter qajet. Balqashtaǵy kompanııa ata-anasyz qalǵan Polına Andropovaǵa óz atynan páter satyp alyp bermekshi. Sondyqtan qor 13 páter alýy tıis. Zardap shekkenderdiń birnesheýi túrli nusqalar izdep qoıǵan. Shahandaǵy páterlerdiń eń arzany 1 mln teńgeni, al Shahtınskidegi páterdiń eń qymbaty 5,5 mln. teńgeni quraıdy», - dep túsindirdi Qamqorshylyq keńesiniń múshesi Svetlana Erjumanova.

Sonymen qatar, páterlerdi satyp alý boıynsha shyǵyndardy QAZKOM óz moınyna aldy, dep habarlaıdy qordyń qamqorshylyq keńesiniń tóraıymy.

Brıfıngte atalyp ótilgendeı, qordyń qarjysy esebinen modýldik qazandyqty satyp alý jáne ornatý, jańa qazandyqty ornatýy, úıdiń qıraǵan bóligin jóndeý jáne úıindilerdi suryptaý, sondaı-aq jobaǵa sáıkes qajetti qurylys jumystaryn júrgizý jasalady.

Esterińizge sala keteıik, 1 qańtar kúni 22 saǵat 40 mınýtta Qaraǵandy oblysynyń Shahan kentindegi turǵyn úıdiń bir bóligi qulady. Qıraǵan úıdiń astynda 9 adam mert boldy. Onyń úsheýi - balalar.