Shahanda qurylǵan qaıyrymdylyq qory qaldyq qarajatty zardap shekkenderge taratyp beredi
Onyń esebinen zardap shekkender otbasylaryna materıaldyq kómek kórsetilip, sondaı-aq TJ saldaryn joıý, qıraǵan úıdi qalpyna keltirý boıynsha shyǵyndar óteldi, dep habarlaıdy Qaraǵandy oblysy ákimdiginiń resmı saıty .
- Qorǵa 203 mln 851 myń teńge jınaldy. Ol kásiporyndardyń, uıymdardyń, jeke tulǵalardyń jibergen aqshalary. 18 shildege deıin 175 mln teńge jumsalyp, qaldyq soma 29,2 mln teńgeni qurap otyr, - dep málimdedi qordyń qamqorshylyq keńesiniń tóraıymy Jamala Mámerhanova.
Qorǵa áli de jarylys bolǵan №4 úıdiń jertólesindegi jumystarǵa qatysty shyǵyndardy óteý kerek bolady.
- Turǵyndar «Qaragandy Kotlomash» fırmasy salǵan jergilikti qazandyqqa shaǵymdanýda. Qys mezgilinde turǵyndar tońbaý úshin jylý taratý júıesine qatysty qajetti jumystardy anyqtaý kerek, - dep túsindirdi Jamala Mámerhanova. - Ázirge qansha aqsha tólep, qansha qaldyq qalatyny belgisiz. Alaıda biz barlyq shyǵyndar ótelgen soń qalǵan qarajatty zardap shegýshilerge taratyp berýdi uıǵardyq. Qaıǵyly oqıǵadan soń qaza bolǵandardyń týystaryna qordan jalpy eseptegende 9,7 mln teńge tólengen bolatyn. Qıraǵan úıindilerdiń astynda qalǵan eki zardap shekken azamat 1,5 mln teńge aldy.
Qor jerleý rásimine jáne qonaq asyna qajetti shyǵyndardy da ótedi. Olarǵa 2 mıllıonnan astam qarjy jumsaldy. Sonymen qatar 9 kún jáne 40 kún ótken soń as berýge 1 mln teńge bólindi. Qor sondaı-aq jyldyq as berýdi de oılastyrǵan - ol úshin qaza bolǵandardyń týystaryna 2,5 mln teńge tólegen. Eskertkishter ornatýǵa 4,5 mln teńge jumsaldy.
Zardap shekkenderdiń múlik qunyn óteý úshin jalpy eseptegende 8,8 mln teńge jaratyldy.
Qıraǵan páterlerdiń ornyna baspanamen qamtýǵa 50 mln teńge jumsaldy. Osyǵan deıin habarlanǵandaı, bul shyǵyndardy demeýshilik qoldaý retinde QAZKOM óz moınyna aldy. Bank satý-satyp alý jáne basqa da qajetti qujattar negizinde shyǵyndardy ótedi.
Polına Andropovaǵa Qaraǵandydan 18 mln teńgege 4 bólmeli páter satyp alyndy. Onyń shyǵynyn QAZKOM men «Qońyrat» Balqash mys kompanııasy birlesip kóterdi. Qyz balanyń bul qaıǵyly oqıǵada ata-anasy men kishkentaı sińlisi qaıtys bolǵan. Qazir Polına onyń qamqorshysy bolǵan ájesimen birge jańa úıde ornalasyp jatyr. Oqýyn qyz bala Ońtústik-Shyǵysta ornalasqan mektepterdiń birinde jalǵastyrady.
Eki jaǵdaıda páter satyp alýdyń ornyna zardap shekkender jalpy eseptegende 8 mln teńge kóleminde materıaldyq ótemaqy aldy.
Qaza bolǵan pesh jaǵýshy Meırambek Jıenbaevtyń otbasyna 1 mln teńge kóleminde ótemaqy tólendi. Sondaı-aq marqumnyń jubaıyna qonaq asy men jerleý rásimderine jumsalǵan 238,6 myń teńge kóleminde qarajat bólindi, mazar salýǵa jáne qulpytas ornatýǵa 491 myń teńge berildi. Qordyń basqa da shyǵyndary 44 mln teńgeden asty.
Sonymen qatar qordan Shahannyń basqa da úıleriniń jertólelerinde ornalasqan qazandyqtardy syrtqa shyǵarý jumystary óteldi - ol 19,5 mln teńge. Bul jumystar shahandyqtardyń qaýipsizdigin qamtamasyz etý úshin jáne tótenshe jaǵdaılardyń aldyn alý maqsatynda jasalyp otyr.
Esterińizge sala keteıik, Shahanda 1 qańtarda jertólede ornalasqan jylytý qazandyǵynyń jarylýy saldarynan bes qabatty úıdiń bir bóligi qıraǵan bolatyn. Úıindiniń astynda qalǵan 9 adam, onyń ishinde úsh bala qaza tapty. Eki adam aýrýhanaǵa jetkizildi.