Shahanda qıraǵan úıdiń qazandyǵy zańsyz ornatylǵan
QARAǴANDY. QazAqparat - Shahandaǵy turǵyn úıdi qıratqan qazandyq zańsyz ornatylǵan, dep habarlaıdy «QazAqparat» HAA tilshisi.
«Men bir nárse ǵana aıta alamyn, talap boıynsha ol jerde qazandyq bolmaýy tıis. Qurylys normalary bar jáne onda turǵyn úıdegi qazandyq qarastyrylmaǵan», - dedi Qazaqstan qaıta qurý jáne damý kópsalaly ınstıtýtynyń dırektory (QazQDKI) Jumaǵul Nýgýjınov jýrnalısterge bergen suhbatynda.
«Qazandyqtyń nemese basqa bir zattyń jarylǵanyn tergeý organdary men quziretti tulǵalar anyqtaıdy. Men bul týraly eshteńe aıta almaımyn. Bir bilerim, qurylymnyń zaqymdanǵanyna qarap jarylystyń bolǵanyn aıta alamyn jáne ol joǵaryda emes, tómende bolǵan. Sebebi, birinshi qabattaǵy baspaldaq kóterilgen (...) Ol jerde múmkin qazandyq, múmkin gaz jaryldy...», - dep aıtty ol, qazandyq nemese gaz ballony jarylǵanyn suraǵan jýrnalısterge.
Onyń aıtýynsha, qalpyna keltirý jumystarynyń quny áli eseptelmegen.
Eske sala keteıik, 1 qańtar kúni 22 saǵat 40 mınýtta Qaraǵandy oblystyq TJD qutqarý bólimshesine Shahan kentindegi kóp qabatty úıdiń jartysy qıraǵany týraly habarlama túsken. Qutqarýshylar qıraǵan úıindiniń astynan qaza bolǵan 9 adamnyń, sonyń ishinde úsh er kisi, úsh áıel adam, úsh balanyń máıitin shyǵardy. Shahandaǵy TJ sebebin vedomstvoaralyq komıssııa anyqtaýda. Aldyn ala derekter boıynsha, tótenshe jaǵdaı avtomatty jylytý júıesiniń aqaýynan bolǵan.
