Shahanda qıraǵan turǵyn úıge qatysty qylmystyq is qozǵaldy
QARAǴANDY. QazAqparat - Qaraǵandy oblysynyń Shahan kentinde qıraǵan turǵyn úıge qatysty qylmystyq is qozǵaldy, dep habarlaıdy «QazAqparat» HAA tilshisi oqıǵa ornynan.
«TJ deregine qatysty materıal QR QK-niń 292-babynyń 3 tarmaǵy (Adam ólimine ákep soqtyrǵan órt qaýipsizdigi talaptaryn buzý) boıynsha sotqa deıingi tergeý jumystarynyń tizilimine tirkeldi», - dep habarlady Qaraǵandy oblystyq ІІD baspasóz qyzmeti.
Buǵan deıin habarlanǵandaı, úıindi astynan 9 kóz jumǵan adamnyń denesi arshyp alyndy . Onyń úsheýi er adam, úsheýi áıel, úsheýi bala. Balanyń bireýi 2016 jylǵy, ekinshisi 2010 jylǵy.
«Turǵyn úı qazandyqtyń jarylýynan qulaǵan. Shahandaǵy birqatar turǵyn úılerge jylý avtonomdyq júıe arqyly beriledi. Bul qazandyq úı komıtetiniń esebinde boldy», - dep málim etti oblys ákimi Nurmuhambet Ábdibekov jýrnalısterge bergen suhbatynda. Ol tótenshe jaǵdaıdyń saldaryn joıý jáne sebebin anyqtaý boıynsha oblystyq komıssııa qurylǵanyn jarııalady.
Ákimniń aıtýynsha, respýblıkalyq komıssııa qurý josparlanýda. TJ ornynda izdeý-qutqarý jumystary jalǵastyrylýda. «Mindetimiz adamdardy anyqtaý úshin úıindilerdi tazalaý jumystaryn aıaqtaý», - dep atap ótti óńir basshysy. Ázirge, bir adam úıindi astynda qalyp qoıǵan.
Ázirge belgilisi, bul kópqabatty úıde 118 turǵyn mekendegen, al TJ oryn alǵan kezde qulaǵan bólikte shamamen 30 adam bolǵan. Turǵyndardyń kóbisin týystary syrtqa shyǵaryp úlgergen. Sonymen qatar, baspanasyz qalǵandarǵa balabaqshanyń ǵımaratynda turýǵa múmkindik berildi.
Saǵat 8:12-de qıraǵan úıindiniń astynan tiri qalǵan 32 jastaǵy er adam qutqaryldy .
Úıindilerdi tazartýǵa 280 adam jumyldyrylǵan , olardyń qatarynda qutqarýshylar, polıtsııa qyzmetkerleri, jergilikti atqarýshy organdar, jedel medıtsınalyq járdem brıgadasy, Ulttyq ulannyń 52859 áskerı bóliminiń aýyr tehnıkasy jáne jeke kásipkerler bar.
Sonymen qatar, Qaraǵandy oblysy Shahtınsk qalasyna qarasty Shahan kentindegi turǵyn úıdiń qulaý oqıǵasyna qatysty Shahan kenti ákimdigi qasynan shuǵyl jeli ashyldy: 8 (72156) 3-24-17.
Eske sala keteıik, 1 qańtar kúni 22:40-ta Qaraǵandy oblysy TJD qutqarý bólimine Shahtınsk qalasy Shahan kentindegi kópqabatty úıdiń bir bóligi opyrylyp túskeni týraly qońyraý shalynǵan . Oqıǵa ornyna shuǵyl túrde TJD qutqarýshylary jóneltilip, turǵyndar evakýatsııalandy . Áýeli 1 adamnyń máıiti úıindi astynan shyǵarylǵan bolatyn. Keıin ekinshi turǵynnyń denesi úıindi astynan tabyldy.
