Shahanda qaza tapqandardyń otbasylaryna 9 mln teńge tóleıdi
QARAǴANDY. QazAqparat - Qaraǵandy oblysynda Shahanda zardap shekkenderge kómek kórsetý qory esebinen qaza tapqandardyń otbasylaryna alǵashqy tólem júrgiziledi, dep habarlaıdy «QazAqparat» HAA tilshisi oblystyq ishki saıasat basqarmasyna silteme jasap.
«Búgin Shahanda TJ saldarynan zardap shekkenderge kómek kórsetý qorynyń qamqorshylar keńesiniń alǵashqy otyrysy ótti. Kent qoǵamdastyǵy ókilderinen quralǵan keńestiń músheleri qaza tapqandardyń otbasylaryna jerleý rásimi úshin 9 mln teńge tóleý týraly sheshim qabyldady», - dep aıtylady habarlamada.
Ary qaraı qordyń qarjysy ótemaqy tóleý jáne turǵyn úı alyp berýge baǵyttalady dep josparlanýda. Qazirgi tańda qordyń shotynda 42 mln teńge jınalǵan, dep kórsetilgen habarlamada.
Basqarmanyń aqparatyna súıensek, Shahanǵa gýmanıtarlyq kómek retinde 6 tonna azyq-túlik, turmystyq taýarlar, tósek jabdyqtary men kıimder túsken.
Osyǵan deıin habarlanǵanyndaı, baspanasyz qalǵan Shahan turǵyndaryna páter qaıyrymdylyq qorynan alyp beriledi. Turǵyn úıdiń 4-shi kireberisindegi barlyq 3 bólmeli úıler qalpyna keltirýge jaramsyz. Sarapshylar kóp qabattyń úıdiń qalǵan úsh kireberisin jaramdy dep tapty. Modýldik qazandyq iske qosylyp, jylý júıesimen qamtamasyz etildi.
Bıliktiń málimdeýinshe, 1, 2 jáne 3 kireberisterdegi 45 páterdiń turǵyndary óz úılerine qaıtyp keldi. Turǵyn úıdegi jylý, jaryq, sý júıeleri tolyqtaı qalpyna keltirildi. 4 kireberistiń opyrylǵan jerleri jóndelýde.
Eske sala ketsek, 1 qańtar kúni 22 saǵat 40 mınýttar shamasynda Qaraǵandy oblysynyń Tótenshe jaǵdaılar departamentine Shahan kentinde kópqabatty úıdiń qulaǵany jóninde arnaıy habar kelip túsken. Oqıǵa ornynan tótenshe jaǵdaılar qyzmetiniń kúsh qurylymdary men arnaıy tehnıkalary jóneltilip, turǵyndardy evakýatsııalaý jumystary júrgizildi.
Qıraǵan úıdiń úıindilerinen 9 adamnyń máıiti tabyldy. Olardyń úsheýi er adam, úsheýi áıel adam, taǵy úsheýi balalar. Resmı tizimdi Qaraǵandy oblysynyń tótenshe jaǵdaılar qyzmeti usyndy.
Qıraǵan úıge qatysty materıal QR QK 292-baby 3-bóligi boıynsha biryńǵaı sot aldy tergeý tizilimine tirkeldi. Qulaǵan úı 1987 jyly salynǵan. Ákimdiktiń aqparatyna sáıkes úıde 118 adam turǵan. Qulaǵan kireberiste 25 turǵyn bolǵan.
Qaıyrymdylyq kórsetem deýshiler úshin qordyń esep nómiri:
«Shahtınsk qalasyndaǵy Shahan kentinde bolǵan tótenshe jaǵdaıdan zardap shekkenderge kómek kórsetý qory» jeke qaıyrymdylyq qory.
«Tsesnabank» AQ-nyń Qaraǵandy qalalyq fılıaly
BIN/IIN: 170140001103
Esep KZT KZ58998HTB0000352677
Kod KBE 18
Bank rekvızıtteri
BIK TSESKZKA
Mekenjaı: 100019, Qaraǵandy qalasy, Chkalov kóshesi 7/4
BANK BIN: 040541008233
